🙏ପ୍ରତିଜ୍ଞା🙏

ପ୍ରତିଜ୍ଞା 

ଏମିତି ଏକ ଶବ୍ଦଟିଏ

ଯେଉଁଥିରେ ସଙ୍କଳ୍ପର

ହସ୍ତାକ୍ଷର ବି ଥାଏ ।

ପ୍ରତିଜ୍ଞା --

ପ୍ରତିଜ୍ଞା ଭିତରେ

ଅଜସ୍ର ଶକ୍ତିର ସମାହାର

ଖାଲି ଦେଖିବାର ଅଛି

ସେ ଶକ୍ତି

ଆମକୁ କେଉଁ ଆଡ଼େ ନେଇ ଯାଉଛି

ମଣିଷ ଭଳି ମଣିଷ ହୋଇ 

ରହିବାକୁ ଦେଉଛି 

ନା,

ଅମଣିଷ କରି ଦେଉଛି |

ପ୍ରତିଜ୍ଞା -

ସଂକଳ୍ପ ଧାରାର

ଶକ୍ତ ସ୍ରୋତଟିଏ

କେତେ ବେଳେ ସେ

ନମସ୍ୟ ହୋଇ ଯାଇଛି ତ

କେତେବେଳେ ବନ୍ଧିତ 

ହୋଇଯାଇଛି

ଆଉ -

ଅନ୍ୟାୟ ଅତ୍ୟାଚାରର

ଦେଖଣା ହାରୀ ହୋଇ ଯାଇଛି

ଭିତରେ ଯନ୍ତ୍ରଣା ମାନଙ୍କୁ

ଜାବୁଡ଼ି ଧରି 

ଚିରକାଳ ପ୍ରଶ୍ନବାଚୀ ଟିଏ 

ହୋଇ ଯାଇଛି

ଯେମିତି ଆମ ଭୀଷ୍ମ ପିତାମହ |

ଆମ ଶାସ୍ତ୍ର ପୁରାଣ

ଏହି ପ୍ରତିଜ୍ଞାର ରୂପ ରେଖକୁ

ଦର୍ଶାଇଛି ଭିନ୍ନ ଭିନ୍ନ ରୂପରେ

ଯେଉଁଠି ପ୍ରତିଜ୍ଞା ନକାରାତ୍ମକ

ସେଠି ସେ ହୋଇଛି ଧ୍ୱଂସକାରୀ

ଆଉ,

ଯେଉଁଠି ସକାରାତ୍ମକତାରେ

ପରିବେଷ୍ଠିତ 

ସେଠି ହୋଇ ଯାଇଛି

ଜୀବନ ଶିକ୍ଷାର ପ୍ରତୀକ 

ଜୀବନ ଜୀଇଁବାର ବାର୍ତ୍ତା । 

ଜୀବନ ପଥର ପ୍ରତିଜ୍ଞା

ମନ, ବିବେକ ଓ ଆତ୍ମାର

ସଂକଳ୍ପରେ

ପରିମାର୍ଜିତ ହେଉ

ଯେଉଁଠି ସେ ସ୍ୱୟଂ କୁ

ପୂର୍ଣ୍ଣତା ପ୍ରାପ୍ତି ଦେବା ସହିତ

ଅନ୍ୟକୁ

ଆଲୋକ ଦେଖାଇବାରେ

ପର୍ଯ୍ୟବେଶିତ ହେଉ ।

ପ୍ରତିଜ୍ଞା -

ପ୍ରତିଜ୍ଞା କାହା ସାମ୍ନା ରେ

କରିବା ପୂର୍ବରୁ

ପ୍ରଥମେ ନିଜେ ନିଜ ପାଖରେ

କରି ନେବାରେ ହିଁ

ପ୍ରତିଜ୍ଞା ର ସ୍ଵର 

ଲୋକାଭିମୁଖୀ ହେବାର ପ୍ରତ୍ୟୟ ଜାଗୁ  |

ପ୍ରତିଜ୍ଞା-

ହେଉ ସ୍ୱ ଶକ୍ତିର ଆଧାର

ହେଉ ସ୍ନେହ, ପ୍ରେମ, ବାଣ୍ଟିବାର 

ଧାରାଟିଏ

ହେଉ, ମାନବିକତାର

ବୀଜ ବୁଣିବାର କ୍ଷେତ୍ରଟିଏ

ହେଉ,

ଜୀବନର ଅସଲ ଲକ୍ଷ୍ୟକୁ

ଆହରଣ କରିବାର 

ଶିକ୍ଷାୟତନଟିଏ

ଆଉ,

ପ୍ରତିଜ୍ଞାର ପ୍ରତି ଟି ପତରେ

ସମର୍ପଣ, ସମ୍ମାନ ଆଉ

କତ୍ତବ୍ୟର ବାର୍ତ୍ତା

ଲେଖି ହୋଇ ଯାଉ ।

ପ୍ରତିଜ୍ଞା -

ସ୍ୱ ରୁ ସର୍ବସ୍ୱ କୁ ଲମ୍ବିଯାଉ

ପରିବାରରୁ ସମାଜକୁ

ସମାଜରୁ ପ୍ରକୃତିକୁ

ବାନ୍ଧି ରଖୁ ତାର

ଶକ୍ତି ସଂକଳ୍ପିତ ରଜ୍ଜୁରେ ।

ପ୍ରତିଜ୍ଞା -

ହେଉ ହିତକାରୀ

ନ ହେଉ ହତକାରୀ

ପ୍ରତିଜ୍ଞା -

ଅନ୍ୟାୟ ଉପରେ ନ୍ୟାୟର 

ଅସତ୍ୟ ଉପରେ ସତ୍ୟର 

ଅତ୍ୟାଚାର ଉପରେ ଆତ୍ମୀୟତା ର

ଆବାହକ ହୋଇ

ବିଦ୍ୟମାନ ହେଉ |

ପ୍ରତିଜ୍ଞା -

ହେଉ ଆଗକୁ ଯିବାର

ଶକ୍ତିଶାଳୀ ସ୍ରୋତଟିଏ

ହେଉ 

ସମସ୍ତ ବିପରୀତ ମୁଖୀ ଘଟଣାକୁ

ସାମ୍ନା କରିବାର ଅଦମ୍ୟ

ଦୃଢ଼ୋକ୍ତି ଟିଏ 

ଆଉ,

ପ୍ରତିଜ୍ଞା - 

ପର୍ଯ୍ୟବେଶିତ ହେଉ

ବାସ୍ତବ ଭିତ୍ତି ଭୂମିକୁ ନେଇ

ଆଉ,

ପ୍ରତିଜ୍ଞା -

ଅଭିନୟ ନୁହେଁ 

ସବିନୟ ଦୃଢ଼ୋକ୍ତିର 

ପ୍ରତିଛବି ହେଉ ।

ପ୍ରତିଜ୍ଞା - 

ନଷ୍ଟ ନୁହେଁ ଇଷ୍ଟ ସେବନର

ଧାରାଟିଏ ହେଉ

ପ୍ରତିଜ୍ଞା ହନନ ନୁହେଁ

ହେଉ

ମନନ ମନ୍ଥନର ସୂତ୍ରଟିଏ |

ଆଉ,

ପ୍ରତିଜ୍ଞାର ପ୍ରତିବଦ୍ଧତା ରେ

ବିଶ୍ଵ ହିତୈଷୀ ର ମନ୍ତ୍ର

ଉଚ୍ଚାରିତ ହେଉ

ଏହା କାମ୍ୟ -