ପ୍ରତୀକ୍ଷାର ପ୍ରତୀକ୍ଷାରେ
ପ୍ରତୀକ୍ଷାର ପ୍ରତୀକ୍ଷାରେ
ମନ ମୋ ଅଥୟ ହେଉନାହିଁ ଥୟ
ଅତୀତ ସ୍ମୃତିକୁ ଝୁରି,
ମନ ଗହନରେ ପ୍ରେମର ଅନଳ
ଖୋଜୁଛି ପ୍ରଣୟ ବାରି ।
କେଉଁଠି ଲୁଚିଛି ମୋ ପ୍ରାଣ ବଲ୍ଲରୀ
ଘାରୁଛି ଅଜଣା ଭୟ,
ଖିଲି ଖିଲି ହସ ପ୍ରେମର ପରଶ
କେମିତି ଭୁଲିବି କୁହ ?
ପ୍ରଥମ ଦେଖାର ଆଖି ଇସାରାରେ
ପଢିଲି ପ୍ରେମର ପାଠ,
ପ୍ରୀତି ଚାହାଣୀର ଲାଜୁଆ ମୁହଁରେ
ଥରୁଥିଲା ତା'ର ଓଠ ।
ଥିରି ଥିରି ଆସି ପାଖେ ଗଲା ବସି
ଗାଇଲା ପ୍ରେମର ଗୀତି,
ଶୁଣି ତା'ର ସ୍ୱର ହେଲା ପ୍ରେମ ଜ୍ୱର
ବଢ଼ିଲା ଦେହର ତାତି ।
ପ୍ରୀତି ଝରଣାର ଶୀତଳ ଜଳରେ
ମେଣ୍ଟିଲା ସେ ଦିନ ତୃଷ୍ଣା,
ସେହି ଦିନ ଠାରୁ ଅପେକ୍ଷା କରିଛି
ଲିଭିନି ପାଇବା ଆଶା ।
ବଞ୍ଚି ବଞ୍ଚି ମରେ ତା'ର ପ୍ରତୀକ୍ଷାରେ
ସରୁନି ପ୍ରତୀକ୍ଷା ସ୍ୱପ୍ନ,
ଭୁଲି ନାହିଁ କେବେ ଭୁଲି ପାରିବିନି
ସେହି ରୂପ ଯଉବନ ।
ତୃଷାର୍ତ୍ତ ହୃଦୟ ଖୋଜୁଛି ଠିକଣା
ଲାଗିଲାଣି ଭାରି ଥକା,
ଚାଲିବା ସାମର୍ଥ୍ୟ ହ୍ରାସ ପାଇଲାଣି
ଚାଲି ପାରୁନାହିଁ ଏକା ।
ହୃଦୟ ସ୍ପନ୍ଦନେ ଦେହରେ କମ୍ପନ
ରାତି ଲାଗେ ଦିନ ପରି
ଫେରିବା ବାଟକୁ ଅନେଇ ବସିଛି
କେବେ ଆସିବ ସେ ଫେରି ??