------ପ୍ରତାରିତ ପ୍ରେମିକ-----

ପ୍ରେମ କରୁଥିଲି ଏବେ ବି କରୁଛି

   ପାରୁନି ପ୍ରେମକୁ ପାଇ

ପ୍ରେମ ପ୍ରତାରଣା ଧକ୍କା ଖାଇ ଖାଇ

   ନିରାଶ ପ୍ରେମିକ ମୁହିଁ

ତଥାପି ସଂଗ୍ରାମ ଜାରି ମୁଁ ରଖିଛି

  ଖୋଜୁଛି ସଫଳ ପଥ

ବରଷକୁ ଥରେ ପରିଶ୍ରମ କରି

   ସବୁବେଳେ ଅସମର୍ଥ

ପ୍ରତ୍ୟେକ ବରଷ ପ୍ରେମ ସପ୍ତାହରେ

   ଫ୍ରେବୁୟାରୀ ସାତ ଦିନ

ସାତ ତାରିଖରୁ ଚଉଦ ପର୍ଯ୍ୟନ୍ତ

   ଅଥୟ ହେଉଛି ମନ

ଭାଲେଣ୍ଟାଇନିର ପ୍ରଥମ ଦିନରେ 

  ତୋଳିଲି ସଦ୍ୟ ଗୋଲାପ

ଗୋଲାପ କଣ୍ଟାରେ ହାତ ଫୁଟି ଯାଇ

   ଝରୁ ଥିଲା ନାଲି ରକ୍ତ

ଧାଇଁ ଯାଇଥିଲି କେତେ ଆଶା ନେଇ

    ରକ୍ତ ଗୋଲାପକୁ ଧରି

ଦେଖିଲି ପ୍ରେମିକା ଖୁସିରେ ବସିଛି

   ମଲ୍ଲିକୁ ଗଭାରେ ମାରି

ବିରସ ବଦନେ ଫେରିଲି ସଦନେ

   ଗୋଲାପ ମଉଳି ନାହିଁ

ଦ୍ଵିତୀୟ ଦିନରେ ଭାବନା ଜାଗିଲା

   ପ୍ରପୋଜ କରିବି ଯାଇ

ସାହସ ବାନ୍ଧିଲି ନମ୍ବର ଖୋଜିଲି

  ଚିପିଲି ବୋତାମ ଯେତେ

ଫୋନ ଉଠେଇ ଜବାବ ଦେଲାନି

  ଆନମନା କଲା ମୋତେ

ଚକୋଲେଟ ଦିନ ଆସିଗଲା ପୁଣି

   ସରାଗେ ବଜାର ଗଲି

ଦେଖିଲି ପ୍ରେମିକା ଅନ୍ୟ କାହା ସଙ୍ଗେ

  ଖାଉଛି ଚକୋଲେଟ ବୁଲି

ମନକୁ ବୁଝେଇ ଭାରାକ୍ରାନ୍ତ ହୋଇ

  ଦୁଃଖରେ ଆସିଲି ଫେରି

ଅବୁଝା ନୟନେ ଝରୁଥିଲା ମୋର

  ଧାରା ଶିରାବଣ ବାରି

ନୟନ ଲୋତକ ସୁଖି ମୋ ନଥିଲା

   ଆସିଲା ଚତୁର୍ଥ ଦିନ

ଚିନ୍ତାକଲି ମନେ ଟେଡିଟିଏ ଦେଲେ

  ଖୁସି ହେବ ତାର ମନ

ପ୍ରେମୀ ଯୁଗଳଙ୍କ ଟେଡିଟିଏ ନେଇ

  ପହଂଚିଲି ପ୍ରିୟା ଘରେ

ଦେଖିଲି ପ୍ରେୟସୀ ଅଳସ ଭାଙ୍ଗୁଛି

  ଜୀବନ୍ତ ଟେଡି ସାଥିରେ

ମନ କରି ଖଟା ଫେରିଲି ଓଲଟା

  ହୃଦ କ୍ରୋଧ ମନେ ମାରି

ରାଗେ ଜର ଜର ହୃଦ ଥର ହର

  ମନ ଯାଉଥିଲା ମରି

ପଲଙ୍କରେ ବସି ପାହିଗଲା ନିଶି

   ପଞ୍ଚମେ ପ୍ରମିଜି ଦିନ

ମନ ଦୃଢ଼ କଲି ପ୍ରତିଜ୍ଞା ମୁଁ କଲି 

 ହଜି ଗଲା ମୋର ଜ୍ଞାନ

ହୃଦୟର ଝଡ଼ ନେଲା ଅନ୍ୟ ମୋଡ଼

  ଥରୁଥିଲା ମୋର ହାଡ଼

ଅଚାନକ ଗଲି ହାତ ଧରି ନେଲି

  ବର୍ଷିଲା ଗାଳିର ଝଡ଼

ତଥାପି ଆଶା ମୋ ମଉଳି ନ ଥିଲା

   ବାକି ଅଛି ତିନି ଦିନ

ନିଶ୍ଚୟ ପ୍ରେମରେ ସଫଳ ମୁଁ ହେବି

  କହୁଥିଲା ମୋର ମନ

ଚୁମ୍ବନ ଦିବସ ନାହିଁ ଅବକାଶ

   ସକାଳୁ କଲି ଗମନ

ଦେଖିଲି ପ୍ରେମିକା ହଲି ହଲି ଆସେ

  କରିବାକୁ ନଦୀ ସ୍ନାନ

ବୁଦା ମୂଳେ ରହି ଲୁଚିଗଲି ମୁହିଁ 

  ନିରୋଳା ଦେବି ଚୁମ୍ବନ

ପ୍ରେୟସୀ ଆସିଲା ବାସ ମହକିଲା

  ଅଥୟ ହୋଇଲା ମନ

ଓଗାଳିଲି ପଥ ଥରୁଥିଲା ଓଠ

  ଧରିଲି ପୁଣି ତା ହାତ

ରଣଚଣ୍ଡୀ ରୂପ କଲା ହତବାକ

 ମାରିଲା ଶକତ ନାତ

ପଡ଼ିଗଲି ତଳେ ଉଠିଲି ବିକଳେ

  ଛାଡ଼ିଗଲା ପ୍ରେମ ନିଶା

ଅତି ଦୃତ ବେଗେ ଧାଉଁଥିଲି ମୁହିଁ

 ଶୁଣିବା ପୂର୍ବରୁ ଭାଷା

ବୁଝିଲାନି ମନ ଆଲିଙ୍ଗନ ଦିନ

    ବଗିଚାକୁ ଗଲି ଧାଇଁ

ଦେଖୁଥିଲି ଖାଲି ପ୍ରେମୀ ଯୁଗଳଙ୍କୁ

  ବସିଛନ୍ତି ଯୋଡି ହୋଇ

ଖୋଜୁଥିଲି ମନେ ଦେଖିଲି ନୟନେ

    ମନର ମାନସୀ ସେହି

ନୂଆ ସାଥି ସଙ୍ଗେ ଖିଲି ଖିଲି ହସେ

  ତିଳେ ମାତ୍ର ଭୟ ନାହିଁ

ହତାସିଆ ହୋଇ ରହିଥିଲି ଚାହିଁ

  ଭକୁଆ ପ୍ରେମିକ ମୁହିଁ

ଭାଲେଣ୍ଟାଇନର ନିଶା ଛାଡି ଗଲା

 ପ୍ରତାରଣା ଖାଲି ପାଇ