ପ୍ରକୃତି ଆଉ ପୁରୁଷ

ଚାଲିଯିବା ଆମେ ଅଜଣା ରାଇଜେ

ଗଢିବା ପ୍ରେମ ନଅର

ସେଇ ନଅରରେ ଦେବି ମୁଁ ତୁମକୁ

ସିନ୍ଦୂରର  ଉପହାର   ।।

ନୀଳ କୁରଞ୍ଜିକୁ  ନୀଳଗିରି ଠାରୁ

ତୋଳି ମୁଁ ଆଣିବି ସାଥି

ଫୁଲର ଶେଯରେ ପ୍ରଣୟ ନିଶାରେ

କଟିଯିବ  ମଧୁରାତି   ।।

ତଟିନୀ ମିଶିବ ନୀଳ ସାଗରରେ

ସୃଷ୍ଟିର ଏଇ ନିୟମ

ସୂର୍ଯ୍ୟମୁଖୀ  ଆଉ ଦିବାକରଙ୍କର

ଯେମିତି ଅମରପ୍ରେମ  ।।

ହଜିଥିବ ତୁମେ ମୋ ବାହୁ ବନ୍ଧନେ

ଋତୁଥିବ  ମିଳନର

ଆଙ୍କି ଦେଉଥିବି ଅଧରରେ ତୁମ

ଦାଗ ମିଠା ଚୁମ୍ବନର  ।।

ସଂସାର ଖେଳରେ ସାଜିବା ଗୋ ଆମେ

ପ୍ରକୃତି ଆଉ ପୁରୁଷ

ଜନ୍ମ  ଜନ୍ମାନ୍ତର ହେବା  ଏକାକାର

ଯେମିତିକା ପାଣିଶୋଷ ।।