ପ୍ରକୃତ ବନ୍ଧୁ

ବନ୍ଧୁତ୍ୱର ହାତ ବଢେଇ ଦେଲି ମୁଁ

ଆଦରରେ ଧରିନେଲ

ଉର୍ଦ୍ଧ୍ୱଗାମୀ ହେଲା ସଂପର୍କ ଆମର

ହୃଦୟକୁ ଆବୋରିଲ

ମୋ ଜୀବନ ପଥେ ତିଆରିଲ ତୁମେ 

ସପ୍ତରଙ୍ଗୀ ଫୁଲବନ

ମୋ ଆଖିର ତୁମେ ନୀଳ ପୁଷ୍କରିଣୀ

ନୀଳ କଇଁ ନୀଳ ମନ

ମେଘୁଆ ମେଘୁଆ ଶ୍ରାବଣ ଆକାଶେ 

ତୁମେ ତୋଫା ଜହ୍ନରାତି

ତୁମେ ପରା ସେହି ପହିଲି ବରଷା

ମୋ ଦେହର ମିଠାତାତି

ଭଗ୍ନ କୋଣାର୍କର ପାଷାଣ ଦେହରେ

ତୁମେ ଜୀବନର ସତ୍ତା

ତୁମରି ହସରୁ ଝରି ଯାଉଥାଏ

ଅସରନ୍ତି ମଣି ମୁକ୍ତା

ଦେଖିଥିଲି ଦିନେ ତୁମକୁ ସପନେ

ପ୍ରେମିକର ମନ ନେଇ

ତୁମେ ସୃଜିଥିଲ ହୃଦୟ କନ୍ଦରେ

ଜେଛନାର ନୀଳନଈ

ସଖୀ ତୁମେ ସଚ୍ଚା ବନ୍ଧୁଟିଏ ମୋର

ହାତରେ ରଖିଛ ହାତ

ମର୍ତ୍ତ୍ୟରେ ମୋ ପାଇଁ ଫୁଟାଇଛ ତୁମେ

ସରଗର ପାରିଜାତ