ପ୍ରିୟା

ଜଳିଯାଏ ମୁଁ ହଁ ଜଳିଯାଏ

ଯେବେ ସ୍ପର୍ଶ କରେ .......

ତୁମ ଶୀତଳ ଉଜ୍ଜ୍ୱଳ ଆଲୋକ ମୋତେ ।

ଭିଜିଯାଏ ମୁଁ ହଁ ଭିଜିଯାଏ

ବିନା ବର୍ଷାରେ......

ତୁମ ପ୍ରୀତିଭରା ଉଷ୍ମ ଆଲିଙ୍ଗନେ ।

ହଜିଯାଏ ମୁଁ ହଁ ହଜେଇଦିଏ ନିଜକୁ

ନୀରବ ଭାବରେ.... ଏକାନ୍ତରେ

ତୁମ ରୂପେଲି କିରଣର ଆକର୍ଷଣେ ।

ବାଦଲ ଆଢୁଆଳେ ଖେଳ ଲୁଚକାଳି

ଜୋଛନା ବରଷାଇ ମନେଦିଅ ପ୍ରେମ ଜାଳି 

ଚୋରା ଚାହାଣୀ ତୁମର କରେ ଆନମନା

ଚଗଲି ମନ ମୋ ସେଥିଲାଗି ଧାଇଁ ଆସେ ସିନା ।

ବୁଡିଯାଏ ମୁଁ ହଁ ବୁଡିଯାଏ

ଖୁସିର ଦରିଆରେ...... 

ଦର୍ଶନ କରେ ଯେବେ ତୁମକୁ ।

ଦୂରେ ତୁମେ ସାଥି ଦୂର ଆକାଶ ବି 

ଦୂର ସମ୍ପର୍କ ଆମର ଦୂର ଭାବନା ବି

ଏ ଆକାଶ ଗଛଲତା ସଭିଏଁ ସାକ୍ଷୀ

ପ୍ରେମ ଆମ ନୁହେଁ ମିଳନ ଅନୁରାଗୀ ।

ଜାଣିଛି ମୁଁ ଆଉ ଜାଣିଛ ତୁମେ 

ମାନୁ କି ନମାନୁ ଏ ସାରା ଦୁନିଆଁ 

ତୁମେ ମୋର ପ୍ରିୟ ମୁଁ ତୁମ ପ୍ରିୟା ।