ବସନ୍ତର ପହିଲି ସକାଳ

ମୁଁ ଦୃଷ୍ଟିନିକ୍ଷେପ କରେ ଦୂର ଦିଗ୍ ବଳୟକୁ

ନିରୀକ୍ଷଣ କରେ ତାର ଶାନ୍ତ ବାତାବରଣକୁ,

ଦଳ ଦଳ ହୋଇ ଧାଡିବାନ୍ଧି ଯାଉଥିବା ବିହଙ୍ଗମାନଙ୍କୁ

ଧଳା ଚାଦର ସଦୃଶ ଚଲା ବାଦଲସବୁକୁ ।

ନିର୍ମଳ ଆକାଶ ଦେଶେ ଉଜ୍ଜ୍ୱଳ ଆଲୋକ ଧାରା

ଫଗୁଣ ମାସର ଏଇ କେଇ ମୁହୂର୍ତ୍ତ....... ,

ମନ୍ଦମଳୟର ସ୍ପର୍ଶ କିଛି ଅନୁଭୂତି ଜନ୍ମାଏ

ଖଟା ମିଠା ସ୍ମୃତିର ଢେଉରେ । 

ଭାବୁଥାଏ ଏଇ ମନ କିଛିକ୍ଷଣ 

ଦୂର ପାହାଡ଼ ଶିଖରକୁ ଦେଖି,

ଦିଗନ୍ତ ବିସ୍ତାରିତ ସବୁଜିମାକକୁ ଆକଳି, 

ଶୁଣୁଥାଏ ମଧୁରିମାଭରା କାକଳି। 

ବିସ୍ମିତ ପଲକେ ନାଚି ଉଠେ

ଆମ୍ବ ,ମହୁଲ ଭରା ଡାଳ...... ,

ଆଖି ଝଲକାଇ ମନେ ତୃପ୍ତି ଦିଏ

ବସନ୍ତର ପହିଲି ସକାଳ।

✍️