ପ୍ରିୟା ମୋର

ଭାବେ ତୁମ କଥା  ନିତି ପ୍ରତି ଦିନ

  ନାଚେ ତୁମ ରୂପ ଆଗେ

ତୁମ ନୃତ୍ୟ ଛନ୍ଦେ  ହୁଏ ମୁଁ ବିଭୋର

   ଗାଏ ରାଗ ଅନୁରାଗେ ।

ଆନମନା କରେ  ତୁମରି ସୁଷମା

   ରସ ଅମୃତ ସୁନ୍ଦର

ତୁମେ ଅନୁପମା  ଜୀବନ ମୂର୍ଚ୍ଛନା

   ସଙ୍ଗୀତ ସ୍ୱର ମଧୁର ।

ଭୁଲି ମୁଁ ପାରେନା  ଆସ ବାରବାର

   ଶୟନେ ଅବା ସ୍ୱପନେ

ଭରଇ ଉଲ୍ଲାସ  ଆନନ୍ଦ ଅପାର

   ତୁମ ସାହଚର୍ଯ୍ୟ ମନେ ।

ତୁମେ ମୋ ଜୀବନ ତୁମେ ମୋର ପ୍ରାଣ

  ତୁମେ ମୋ ବିଶ୍ୱାସ ଆଶା

ଲାସ୍ୟହାସ୍ୟମୟୀ  ଅନନ୍ୟା କବିତା

  ତୁମେ ମୋ ହୃଦୟ ଭାଷା ।

ପ୍ରିୟା ତୁମ ମୁଖ  ଶାନ୍ତି ଶତଦଳ

   ବିକଶୁ ଉଜ୍ଜ୍ୱଳ ରଙ୍ଗ

ନିରେଖି ଜୀବନ  ସଞ୍ଚରୁ ସୁବୋଧ

   ଉକୁଟୁ ଭାବ ସୁଗନ୍ଧ ।

   ------