ପରୀଟିଏ

ସରଗ ପୁରର ପରୀଟିଏ ତୁମେ

   ସରଗୁ ଓହ୍ଲାଇ ଆସି ।

ମୋହରି ସହିତ ସମ୍ପର୍କ ଗଢିଛ

   ଆନନ୍ଦ ଉଲ୍ଲାସେ ହସି ।।

ରୂପରେ ଗୁଣରେ ତୁମରି ସହିତ

   କେହି ତ ନୁହଁନ୍ତି ସରି ।

ନୂତନ ପୋଷାକ ପରିଧାନେ ତୁମେ

    ଦିଶୁଛ ସୁନ୍ଦର ଭାରି ।।

କଣ୍ଠ ସ୍ୱର ତୁମ ଅତୀବ ମଧୁର

   ମଧୁର ତୁମରି ହସ ।

ପାଇଗଲେ ଥରେ ଭାରି ଭଲ ଲାଗେ

  ତୁମରି ସେ ମଧୁ ସ୍ପର୍ଶ ।।

ମୋ ହୃଦ ମନ୍ଦିର ଅଧିଷ୍ଠାତ୍ରୀ ଦେବୀ

   ପ୍ରେମର ପ୍ରତୀକ ହୋଇ ।

ପୂଜା ପାଉଥାଅ ସଦା ମୋ ହୃଦୟେ

   ପ୍ରେମ ଟିକେ ମୋତେ ଦେଇ ।।

ତୁମରି ପ୍ରେମରେ ଅହରହ ମୋତେ

   ଭିଜେଇ ଦେବାର ପାଇଁ ।

କୃତଜ୍ଞତା ଆଜି ଜ୍ଞାପନ କରୁଛି

   ତୁମ ପ୍ରେମେ ଭିଜି ମୁହିଁ ।।