ପରିଚୟ

ମାଟି ସଙ୍ଗେ ମୋର ସମ୍ପର୍କ ନିବିଡ଼

କ୍ଷତ୍ରିୟ ମୁଁ ଚଷାପୁଅ

ମାଟି ମୋ ଜୀବନ ଧରମ କରମ

ମାଟି ମୋର ପରିଚୟ ।

ମାଟି ସଂସାଧନ ମୁଖ୍ୟ ଘଟସୁତ୍ର

ମୂଳ ପଞ୍ଚ ମହାଭୂତ

ସଞ୍ଚରେ ଜୀବନ ସ୍ଥାବର ଜଙ୍ଗମ

ଉଦବର୍ତ୍ତେ ଜୀବ ଜଗତ ।

ମୁଁ ଆଦି ସେବକ ମାତା ପ୍ରକୃତିର

ଜାଣେ ନାହିଁ ଛନ୍ଦ ମାୟା

ମୁଁ ହସିଲେ ହସେ କାନ୍ଦିଲେ ସେ କାନ୍ଦେ

କୋଳ ତାର ଶେଷ ସାହା ।

ଜାଣେ ମାଟି ମାଆ ଆକାଶ ପବନ

ବଳିଦାନ ତ୍ୟାଗ ବ୍ୟଥା

ଝରେ ଶୁଭାଶୀଷ ହରେ କ୍ଷତ ଦୁଃଖ

ନିବାରିତ ହୁଏ କ୍ଷୁଧା ।

ନିଗିଡେ ମୋ ଦେହୁ ଲୁହଲହୁ ଝର

ରକ୍ତ ମୋ ବିଶୁଦ୍ଧ ପାଣି

ଦିଏ ମାଟି ମାଆ ସୁନାର ଫସଲ

ଶ୍ରମ ସେବା ମୂଲ୍ୟ ଜାଣି ।

ଘୂରେ କାଳଚକ୍ର ଅଖ ଚକ ରଥ

ଭଗ୍ନଶିଳା କୋଣାରକ

ଦୁଷ୍କର ବଞ୍ଚିବା କୁଳ ସସମ୍ମାନେ

କୃଷି ଐତିହ୍ୟ କୃଷକ ।

ସମତାଳେ ହେଉ କୃଷିର ଉନ୍ନତି

ଲାଭପ୍ରଦ ହେଉ ପେଷା

କୃଷି ଦେଶରକ୍ଷା ସେବା ପ୍ରାଥମିକ

ସୁବିଶ୍ୱସ୍ତେ ହେଉ ଶିକ୍ଷା ।

ମାଟିର ସୁଗନ୍ଧ ମହକିତ ହେଉ

ଅନ୍ନୁ ମିଳୁ ଜ୍ଞାନ ଦିବ୍ୟ

ମାଟିର ମଣିଷ ମିଶିବ ମାଟିରେ

ଛାଡ ସର୍ବେ ଅହଂ ଭାବ ।