ପରିଚୟ ମାଗୁଛି ମାତୃଭାଷା

ପରିଚୟ ଆଜି ମାଗୁଅଛି ମାତୃଭାଷା 

ଆହେ କବି ମାନେ ଶୁଣ

ପାଠକ ଲେଖକ ପାଖରୁ ଦୂରେଇ 

ଯାଉଛି ଯାହା ଦିନକୁ ଦିନ ।

ଲାଗିରହେ ଯଦି ଏପରି ଅବସ୍ଥା , 

ପରିସ୍ଥିତି ଚିରଦିନ ସମାନ

ଲୋକ ମୁଖେ ସିନା କଥିତ ହୋଇଣ 

ବଢେ ଭାଷାର ସମ୍ମାନ ।

ଇଂରାଜୀ ଯେ ଆଜି ବିସ୍ତାର କରିଛି

ସବୁଠି ନିଜ ପ୍ରାଧାନ୍ୟ 

ଓଡିଆ ଭାଷାର ସୁମଧୁର ଭାବ 

ତା' କବଳେ ପଡି ନ୍ୟୁନ ।

ହୋଇ ଚାଲିଅଛି ଏବେ ଦିନୁଦିନ  

ସୁଚାରୁ ଭାବ‐ମାଧୁରୀ

ଇଂରାଜୀ କବଳେ ହ୍ରାସହୋଇ ଚାଲେ 

ଆହ୍ଲାଦିନୀ‐ଚାରୁ ‐ଚାତୁରୀ ।

ଇଂରାଜୀ ପଠନେ ଇଂରାଜୀ ଲିଖନେ 

ଛୋଟ ବଡ ସବୁକାମେ

ଆମେ ଓଡିଆଏ ଲାଗି ରହିଅଛେ 

ଇଂରାଜୀ ପ୍ରୀତି ‐ଆହ୍ବାନେ ।

ଇଂରାଜୀ ମାଧ୍ୟମ ବିଦ୍ୟାଳୟେ 

ପିଲା ପଢୁ ଛନ୍ତି ସର୍ବାଧିକ

ଓଡିଆ କଥନ, ପଠନ , ଲିଖନ 

ପ୍ରୀତି କୁ ଆମର ଧିକ୍ ।

ଖାଣ୍ଟି ଓଡିଆ କହିଲେ ଚିଲ୍ଲାଇବେ  

ଗଣ୍ତ ବୋଲି କହି ମୁହଁକୁ ମୋଡି

ଇଂରାଜୀ କହିଲେ ଆଦରରେ ଲୋକେ 

ଆଶ୍ଳେଷିବେ କୋଳକରି ।

ଧନ୍ଯ ଆମର ମାତୃଭାଷା ପ୍ରତି ପୀରତି 

ହୋଇଛି ଆଜି ଏପରି

ସୁପ୍ରାଚୀନତର ଓଡିଆ ଭାଷାର 

ପରିଚୟ ନାହିଁ ଇଂରାଜୀ ପଢି ।

ହେବା ପାଇଁ ବଡ ଅଫିସର ନେତାସମାଜେ 

ସୁନାମ ଯଶ ଓଖ୍ୟାତି

ପାଇଁକି ସକଳେ ଆଜି ଇଂରାଜୀ 

ମୋହରେ ବାଇ ହୋଇଛନ୍ତି ।

ଚାରୁହାସମୟୀ ଚାରୁଭାଷମୟୀ ଥିଲା

ଯେ ପ୍ରାଚୀନ ମହାନ ଭାଷା

ଇଂରାଜୀ‐ଭାଷା କବଳେ ପଡିଯାଇ 

ଆଜି ହୁଏ ନିତି ଲୋକହସା ।

ପରିଚୟ ମାଗେ ମାତୃଭାଷା ଆଜି 

ଆମ ବଢାଇବା ୟାର ଯଶ

ଆଉ କେ ଭାଷାରେ ଅଛି ଏହା 

ପରି ଅକାରାନ୍ତ ‐ଧ୍ବନି, ସୁ‐ସରସ ।

ସୁ‐ସାହିତ୍ୟ ଯହିଁ ଭୁରି ଭୁରି ଭରା 

ମାନବୀୟ ଭାବ‐ସ୍ପନ୍ଦନ

ସକଳ ବିଷୟ ସୁଚାରୁ କୌଶଳେ 

ପ୍ରକାଶନରେ ସକ୍ଷମ ।

ହେଲେବି ଇଂରାଜୀ ଭାଷାର ବାହୁଲ୍ୟ 

ଲାଗି ରହିଛି ସବୁଠି

ବ୍ଯବହାର ହୁଏ ଇଂରାଜୀ ଭାଷାର  

ପୋଥି ଠାରୁ ସବୁ ନଥି ।

ପରିଚୟ ମାଗେ ମାତୃଭାଷା ଆଜି 

ହେବା ପାଇଁ ବ୍ଯବହାର

ପଢିବା ,କହିବା ,ଲେଖାବା କାମରେ 

ଲଗାଇବା ନିରନ୍ତର ।

ଲୋକ ‐ସଂସ୍କୂତି ହିଁ ପରିଚୟ ଦିଏ  

ଭାଷା ଓ ଭାବ‐ଭଣ୍ତାର

କବି ଲେଖନୀରେ ଋଦ୍ଧି ମନ୍ତ ହୁଏ 

ନିସର୍ଗ ସୂଷ୍ଟି ‐ସଂଭାର‐ଭାର ।

ଅଧ୍ୟୟନ ଆଉ ଆଲୋଚନା ବଳେ

ସିନା ବଢେ ଭାଷାର ଗାରିମା 

ଉତ୍ତରୋତ୍ତର ଯେ ଅଗ୍ରଗତି କରେ 

ହେଲେ ଭାଷା ‐ଗବେଷଣା ।