ପରିବେଶ ସୁରକ୍ଷା

ତିନି ଭାଗ ଜଳ ଭାଗେ ମାତ୍ର ସ୍ଥଳ 

ଏ ପୃଥିବୀରେ

ମଣିଷର ପ୍ରାଣ ଅମ୍ଳଜାନ ଅଟେ

ସଂସାର ଭିତରେ l

ଛଅ ଋତୁ ଠିକ ଭାବେ ଚାଲୁଥିଲେ 

ଝରୁ ଥିଲା ଝର

ନଦୀ ଝରଣା ଭରି ରହିଥିଲା ଲୋକ 

ପାଉଥିଲେ ନୀର l

ସମୟ ସ୍ରୋତରେ ଅତୀତ ବାସ୍ତବର 

ଚିତ୍ର ହୋଇଛି ଏବେ ସପନ

ଶିକ୍ଷା, ଶୃଙ୍ଖଳା, ଶିଷ୍ଟାଚାର, କଳାର

ଜୀବନ ଜୀବିକା ହୋଇଛି ଛିନ୍ନ l

ହୋଇଛି ଅବୁଝା ବିଛୁଆତି, ବାଇଡଙ୍କ

ଚରିତ୍ର ମାନଙ୍କ ଶାସନ

ମିଛ ସଂସ୍କାର ଆଉ ସଂସ୍କୃତି ନାମରେ 

ନାଟୁଆ ମିଛୁଆ ମାନଙ୍କ ଶାସନ l

ଅତୀତର ଦିନ, ଝୁରୁଅଛି ମନ, ଆଜିର 

ଦୁର୍ଦ୍ଦିନ ପରିବେଶକୁ ଦେଖି, 

ଲାଗୁଛି ମନସ୍ତାପ, କେତେ ଦୁଃଖ ହୁଏ

ଲୁହକୁ ଝରାଏ ଆଖି l

ପରିବେଶ ସୁରକ୍ଷା ଲୋକ ଦେଖାଣିଆ

ନାଟ ହୋଇଛି ସତେ 

କଥାକୁହା ଏବେକାର ନୀତି, ଧଳା କି ସତେ

 ନୋହିବ ଅଙ୍ଗାର ଶତ ଧଉତେ l

ଶିଳ୍ପ ଇନ୍ଦ୍ରଜାଲ ସୁଖେ ମାତିଛି ମଣିଷ 

ବଣ ଜଂଗଲ କରିଲେ ଖାଲି

ଧୂଳି ଧୁଆଁ ଆଉ ଗରଳ ଢାଳିଣ ବିଦ୍ଦୀର୍ଣ୍ଣ 

କରିଛି, ସମସ୍ତେ ଯାଉଛନ୍ତି ଜଳି l

ତପ୍ତ ବସୁନ୍ଧରା ଅନଳେ ଯାଉଛି ଜଳି 

ତାତିର ବୃଦ୍ଧିରେ 

ସଂସାରର ଵୋଝ ବୋହି ହେଉନି କହେ

ଛଳ ଛଳ ଆଖିରେ l

ବିରାଜିତ ବିଶ୍ବେ ବିଦ୍ଦୀର୍ଣ୍ଣ ପ୍ରକୃତି ନିଦାଘ

ଉତ୍ତାପ ବର୍ଷା ବତାସ

ଦୃଶ୍ୟମାନ ହୁଏ ଅସାଧ୍ୟ ରୋଗ ମାଡି ଆସୁ 

ଅଛି ଅଦ୍ଭୁତ ତ୍ରାସ  l

ପ୍ରକୃତି କହୁଛି ମଣିଷକୁ ଡାକି ଶୁଣ,

ମୋ ଅନ୍ତର କଥା,

ଦିନୁ ଦିନ ବଢେ ଯନ୍ତ୍ରଣା ମୋହର 

ହେଉଛି ବହୁତ ବ୍ୟଥା l

ସର୍ବସଂହା ମୁହିଁ ସବୁ ସହୁଛି ଛାତିକୁ 

ପଥର କରି

ମଣିଷର କାର୍ଯ୍ୟ ଅସହ୍ୟ ହେଲାଣି

ଧୈର୍ଯ୍ୟ ପାରୁନି ଧରି l

ବଣ ଜଙ୍ଗଲରେ ପରିପୂର୍ଣ୍ଣ ଥିଲା

ପୃଥିବୀର କୋଳ

ଜୀବ ଜନ୍ତୁ ଆନନ୍ଦେ ରହିଥିଲେ ଫଳୁ

ଥିଲା ବିଭିନ୍ନ ପ୍ରକାର ଫଳ l

ରଙ୍ଗ ବେରଙ୍ଗର ଫୁଲ ପ୍ରକୃତିର ଗୀତ 

ଗାନ ହଜିଛି, ରହିଛି ସ୍ମୃତି ହୋଇ

ନିଜ ସ୍ୱାର୍ଥେ ପରିବେଶକୁ ଧ୍ୱଂସ କରି 

ନର ଦେଇଛି ତ ସବୁ ଉଜୁଡାଇ l

ପାଇବାକୁ ହସ ରେ ମଣିଷ ସମାଜ

ଇଛା ମୋର ରହିଲା ଇତି 

ନର୍ଦ୍ଦମାର ଗନ୍ଧରେ ଏ ମଣିଷ ଜୀବନ 

ରକ୍ଷା କରିବା କେମିତି l

ଆଜିର ଶିଶୁ, ନିଅରେ ଶପଥ, ଗଢ଼ିବ 

ଭାରତ ମାତାର ଭବିଷ୍ୟତ

ଆମ ପରିବେଶ, ଆମ ଉଜ୍ଜଳ ଆଶାର 

ଜ୍ୟୋତି ତାହା କରିବ ଶକ୍ତ l

ହେବା ବୈଜ୍ଞାନିକ, ନୂଆ ସୂତ୍ର କରି ଆବିଷ୍କାର, 

ଗଢ଼ିବା ଜୀବନ ଧାରଣ ଶୈଳୀ

ସୁସ୍ଥ ସମାଜ ହୋଇବ ପ୍ରକଟ, ସୃଷ୍ଟି ହେବ ବହୁ ଶାନ୍ତ 

ସବୁଜ ବନାନୀ ପାଇଁ ନୂଆ ପ୍ରଣାଳୀ ।

ଜଳ ହିଁ ଜୀବନ ତାକୁ କରିବା ସଂରକ୍ଷଣ

ହେବ ଜଳର ସଦୁପଯୋଗ

ମୋର ଦୃଢ଼ ବିଶ୍ୱାସ, ଆଜିର ଶିଶୁ ଆଣି ପାରିବେ 

ଆସନ୍ତାକାଲି, ନଥିବ ତିଳେ ଅଭିଯୋଗ l