ପ୍ରେମୋଦୟ ଚମ୍ପୂ (ଲ)

ପ୍ରେମୋଦୟ ଚମ୍ପୂ

କବି ସୂର୍ଯ୍ୟ ବଳଦେବ ରଥ

(ଚୌପଦୀ ପ୍ରେମୋଦୟ )

(29)

ରାଧାଙ୍କ ପ୍ରତି ଶ୍ରୀକୃଷ୍ଣ

ରାଗ – ତୋଡି - ନିଃସାରୂ ତାଳ

ବନ୍ଧୁ ମୋ ହୃଦୟ ହାରା  ବନ୍ଧୁକ ଚାରୁ ଅଧରା

ବିଅର୍ଥେ ନକର ମାନ -ବିକାଶୁ ଚନ୍ଦ୍ର ବଦନ (ଘୋଷା)

ହଇ ମଳୟାନିଳ --  ବିରହୀ - ହୃଦ ଆକୁଳ

କରନ୍ତି ଅତି କୋମଳ- କୋକିଳ କୁଳ

କିରଣରେ ଧରାତଳ - କରି କେଡେ ସୁମଞ୍ଜୁଳ

ଗଗନେ ହୋଇ ନିର୍ମଳ - ଉଦୟ ଚନ୍ଦ୍ରମଣ୍ଡଳ (1)

ବନଜମୟନେ ବନ - ରଖି ରମଣୀ ରତନ

କରପଲ୍ଲବେ ବଦନ - କମଳ କରି ଧିଆନ

ନକହୁ ମତେ ବଚନ - ଅଧର ସ୍ମିତ ବିହୀନ

ଆଜ ତ ଏଡେ ବିମନ - କିମ୍ପା ରେ ଜୀବ ଜୀବନ (2)

ବନ୍ଧୁ, ତୋ ଗୁମାନ ଆଜି- ଦେଖି ଧନୂର୍ଗୁଣ ମାଜି

ମରମକୁ ଖୋଜି ଖୋଜି - ବିନ୍ଧେ ସ୍ମର ଶରରାଜି

ମୋ ହୃଦରେ ଆଣ୍ଟେ ବାଜି - ଯିବା ସକାଶରୁ ମଜି -

ଗଲାଣି ମୋ ଧୃତି ହଜି - ନୋହୁଛି ତୁ କିମ୍ପା ରାଜି (3)

ବଦନ ଚାରୁ ଅମ୍ବୁଜ - କର ତୁ ପ୍ରସନ୍ନ ଆଜ

ଦେଖି ପୂର୍ଣ୍ଣ ଦ୍ୱିଜରାଜ - ପାଉ ଅତିଶୟ ଲାଜ

ମୋଠାରୁ ଗୁମାନ ତେଜ- ଆଭରଣେ ତନୁସାଜ

ମୋର ଅଙ୍କରେ ବିରାଜ- ଭଣେ ବସୁଦୁର୍ଗ ରାଜ (4 )