ପ୍ରେମମୟୀ ତୁମେ
ପ୍ରେମମୟୀ ତୁମେ
ସରଗ ରାଇଜ ସୁଷମା ମାଧୁରୀ ସେନେହ ଶରଧା ନେଇ
ପ୍ରେମମୟୀ ତୁମେ ଆସିଲ ଓହ୍ଲାଇ ହସାଇ ମରତ ଭୂଇଁ |
ଖୋଜୁଥିଲା ମନ ଯାହା ଚିରଦିନ କରିଦେଲ ପରିପୂର୍ଣ୍ଣ
ଧନ୍ୟ ଦୟାମୟ ଧନ୍ୟ ଲୀଳାମୟ କରିଲ ଜୀବନ ଧନ୍ୟ |
କେଉଁ ଭାଗ୍ୟବଳେ କୋଟି ପୁଣ୍ୟ ଫଳେ ପାଇଲି ସରଗ ତାରା
କି ଶୁଭ ବେଳାରେ ପ୍ରେମ କୁହୁକିନୀ ସହଜରେ ଦେଲା ଧରା |
ଭୁଲିଲି ଦିବସ ଭୁଲିଲି ରଜନୀ ଭୁଲିଲି ସାରା ସଂସାର
କରି ଜପା ମାଳି ପ୍ରେମର ସଙ୍ଖାଳି କଲି ତାକୁ ଗଳାହାର |
ଦିନ ପରେ ଦିନ ମାସ ପରେ ମାସ ବର୍ଷ ପରେ ଯାଏ ବର୍ଷ
ଜାଣି ପାରେନାହିଁ ପାଣି ପରି ବହି ଯାଏ କାଳ ନିରଙ୍କୁଶ |
ଶୁଷ୍କ ମରୁଭୂମି ସୁଜଳା ସୁଫଳା କରିଦେଲ ପ୍ରେମଶୀଳା
ପଳିତ ବାର୍ଦ୍ଧକ୍ୟେ ଉତ୍ତାଳ ଯୌବନ ଖେଳାଇଲ କାମକଳା |
ଶତ ସିଂହବଳ ଭରିଦେଲ ତୁମେ ହୋଇଲି ବିଶ୍ୱବିଜୟୀ
ଜନମେ ଜନମେ ସାତ ଜନମରେ ଭୁଲି ନପାରିବି ସହୀ |
ଚାରୁ ସୁଧାବୋଳା ସେନେହ ସରଣୀ ମୋ ପାଇଁକି ମୁକ୍ତିପଥ
ଚନ୍ଦ୍ରମା ବଦନୀ ଚିତ୍ତ ବିମୋହିନୀ କାମ ସାଗର ବୋଇତ |
ଓଠରୁ ଝରଇ ସ୍ନେହ ସୁଧା ବାରି ହସରୁ ଝରଇ ମହୁ
ଭୁଲି ଯାଏ ଦୁଃଖ ଯାତନା ଯେତେକ କଥା ପଦେ କହୁ କହୁ |
ପରଶେ ହସିଲା ମୋ ସୁନା ସଂସାର ଖେଳିଲା ସମ୍ପଦ ଶିରୀ
ପଲ୍ଲବିତ ହେଲା ଉଜୁଡ଼ା କାନନ ବସନ୍ତ ଆସିଲା ଫେରି |