ପ୍ରେମମୂର୍ତ୍ତି ଜୟଜୟ

ସତୁରୀ ଉପରେ ହୋଇବ ବୟସ

ସାଆନ୍ତ ପିତିଆ ବୁଢ଼ା

ଚାଲେ ଠୁକୁଠୁକୁ ଧରି ଆଶାବାଡି

ବାଙ୍କିଯାଏ ଅଣ୍ଟା ଅଧା ।

ଖଣ୍ଡେ ଦୂର ଯାଇ କିଣିଲା ମିଠେଇ

କଦଳୀ ନଡ଼ିଆ ଛେନା

ଘରକୁ ଆସିକି କହିଲା ବୁଢ଼ୀକୁ

ଚାଲ ମନ୍ଦିରକୁ ଯିବା ।

ସଜ କରିଦିଅ ଧୂପ ଭୋଗରାଗ

ନୈବେଦ୍ୟ ଅର୍ଘ୍ୟଥାଳୀ

ଆଜିପରା ଆମ ବିବାହ ବାର୍ଷିକୀ

ଯାଉଛି ପଚାଶ ପୂରି ।

ଗାଧୋଇ ପାଧେଇ ପାଇକଛା ମାରି

ଜେଜେ ପିନ୍ଧି ନୂଆ ଧୋତି

ନାଲିଆ ଗାମୁଛା କାନ୍ଧରେ ପକାଇ

ବସିଲା ଆସନ ପାତି ।

ବୁଢ଼ୀ ସଜହେଲା ନାଲି ଶାଢ଼ୀ ପିନ୍ଧି

ହାତରେ ଶଙ୍ଖା ଓ ଚୁଡି

ମଥାରେ ସିନ୍ଦୂର ଟୋପାଟି ତାହାର

ଦୂରୁ ହେଉଥିଲା ବାରି ।

ପୂଜାଥାଳୀ ଥୋଇ ବୁଢ଼ା ପାଦ ଛୁଇଁ

ବୁଢ଼ୀ କଲା ଦଣ୍ଡବତ

କହିଲା ତୁମେ ତ ମୋ ବଡ଼ଠାକୁର

ଜଗନ୍ନାଥ ପ୍ରାଣନାଥ ।

ହଉ ହଉ ହେଲା ଶୁଭ ଆଶୀର୍ବାଦ

ପତ୍ନୀ ରାଣୀ ଆଗେ ଚାଲ

ଦେଉଳକୁ ଯାଇ ମାରିବା ମୁଣ୍ଡିଆ

ମନାସିବା ସବୁ ଭଲ ।

ଆଗପଛ ହୋଇ ଯାଉଥିଲେ ଦୁହେଁ

ଜେଜେ ଆଉ ଜେଜେମାଆ

ଦେଖଣାହାରୀଏ ରହିଥିଲେ ଚାହିଁ

ଖୋଲାମେଲା ପାଟି ଆଆଁ ।

ଫୁଟୁଥିଲା ସତେ ପ୍ରଫୁଲ୍ଲ କମଳ

ପ୍ରତି ପଦକ୍ଷେପ ଚିହ୍ନେ

ଝରି ପଡୁଥିଲା ସତେକି ସୁମନ

ଆକାଶରୁ ଅନୁକ୍ଷଣେ ।

ହାରିଯାଏ ଯହିଁ ମରଣର ଭୟ

ଅଟକି ଯାଏ ସମୟ

ଉଜ୍ଜ୍ୱଳ ଆଦର୍ଶ ପ୍ରେମ ଚିରନ୍ତନ

ପ୍ରେମମୂର୍ତ୍ତି ଜୟଜୟ ।