ପ୍ରେମଗୀତି

ଜାଣିଛି ଗୋ ବନ୍ଧୁ ଜାଣିଛି

ଆମେ ହଜିଯିବା କାଳ ସାଗରେ

ଧୋଇଦେବ ଢେଉ ପାଦଚିହ୍ନ ଆମ

ଆଉ ଫେରିବାନି ଏଇପଥରେ ।

ଆମେ ଛାଡିଯିବା ଆମ ପ୍ରେମଗୀତି

ବିରହ ମିଳନର ମଧୁଝର

କାଳ ଘୋଷୁଥିବ ଝାଉଁର ମର୍ମରେ

ଆମ ପ୍ରଣୟ ମାଧୁରୀ ସୁର ।

ନଥିବ ତ ତମେ ନଥିବି ଗୋ ମୁହିଁ

ଥିବ ଖାଲି ଆମ ସ୍ମୃତିରେ

ଜାଣିଛି ଗୋ ବନ୍ଧୁ ଜାଣିଛି

ଆମେ ହଜିଯିବା କାଳ ସାଗରେ ।

ଆସ ହେ ପ୍ରିୟ ଶୋଚନା କି ପାଇଁ

ଅଧୁରା ଚିବୁକ ମୋ ତୋଳିଧର

ଲୋଟିଯାଏ ମୁହିଁ ତମ ବକ୍ଷଦେଶେ

କାଳଗତି ହେଉ ଥିର ।

ପ୍ରେମ ମଦିରାରେ ମତୁଆଲା ଆମେ

ମାନିବାନି କା'ର ବାଧାରେ

ଜାଣିଛି ଗୋ ବନ୍ଧୁ ଜାଣିଛି

ଆମେ ହଜିଯିବା କାଳ ସାଗରେ ।