ପ୍ରେମାମୃତ

ପ୍ରେମରେ ପ୍ରେମରେ   ସରେ ନାହିଁ କଥା

     ପାହେ ନାହିଁ ଶୁଭ ରାତ୍ରୀ

ପ୍ରେମରେ ପ୍ରେମରେ    ଚହଟଇ ମଲ୍ଲି

      ମହକେ ଗଙ୍ଗଶିଉଳି ।

ଯୂଇଯାଈ ହେନା    ରଜନୀଗନ୍ଧାର

      ଭୁରୁଭୁରୁ ସୁଗନ୍ଧରେ

ରଜନୀ ସଜନୀ    ଖୋଲଇ କବରୀ

    କୃଷ୍ଣଚୂଡା ଦୋଳି ଖେଳେ ।

ବାଜେ ରୁଣୁଝୁଣୁ    ପାଦର ପାଉଞ୍ଜି

     ପ୍ରଖରେ ପ୍ରଶ୍ୱ।ସ ଶ୍ୱାସ

ଉଚ୍ଛସେ ଜୀବନ   ଭେଦ ଓ ଅଭେଦ

     କାୟାଛାୟା ରସରାସ ।

ପ୍ରେମରେ ପ୍ରେମରେ   ବରଷଇ ସୁଧା

     ସେନେହ ମମତା ପ୍ରେମ

ସୃଜେ ପ୍ରତିବିମ୍ବ   ଆଖିରେ ଆଖିରେ

     ବତୁରେ ସବୁଜ ସ୍ୱପ୍ନ ।

ପଲ୍ଲବେ ନୂତନ   ଆଶା ଫଳ ପୁଷ୍ପ

     ହୁଅଇ ଅଙ୍କୁରୋଦ୍ଗମ

ଉନ୍ମେଷେ ଜୀବନ  ପ୍ରେମରେ ପ୍ରେମରେ

     ଅମୃତ ପ୍ରେମ ମହାନ ।

ପ୍ରେମରେ ପ୍ରେମରେ   ଚଉବର୍ଗ ପ୍ରାପ୍ତି

    ଧର୍ମ ଅର୍ଥ କାମ ମୋକ୍ଷ 

ପ୍ରେମ ମଧୁମୟ    ଜୀବନ ସଙ୍ଗୀତ

     ନନ୍ଦନର ପାରିଜାତ ।

ମହକୁ ଜୀବନ    ପ୍ରେମ ସୁଧାମୃତେ 

     ପ୍ରାଣ ହେଉ ସୁଶୀତଳ

ବିକଶୁ କମଳ    ଶାନ୍ତି ଶତଦଳ

      ହୃଦପଦ୍ମ ସହସ୍ରାର ।