ପ୍ରେମ
ପ୍ରେମ
ପ୍ରେମ ଏକ ଅକଥ୍ୟ ଖୁସି ହୃଦୟର,
ଅତୀଶ ଆନନ୍ଦ ମନର |
ପ୍ରେମ, ଅଟେ ଅନନ୍ୟ ସୃଷ୍ଟି ସଂସାରର,
ସଂଯୋଗ ବଟି ଜୀବନର |
ପ୍ରେମ ହିଁ ଉଦ୍ଭାବନ ଆଉ ଆବିଷ୍କାର,
ପ୍ରାରମ୍ଭ ନବ କାହାଣୀର |
ପ୍ରେମ, ଅଟେ ଚିର ଶାଶ୍ୱତ, ଅବିନଶ୍ୱର,
ପ୍ରେମ କରେ କେବେ ମିଳନ ପୁଣି ଅନ୍ତର |
ପ୍ରେମ ଯୋଗୁଁ ନବଜାତ ସୃଷ୍ଟି ହୋଇଥାଏ,
ପୁଣି ଶତ ଜନ ମନେ, ପ୍ରେମ ଉପୁଯାଏ |
ପ୍ରେମ କାହାପାଇଁ ପବିତ୍ର ତ କାହାପାଇଁ ପାପ,
ଛଳନା କରିଲେ ପ୍ରେମ ଦିଏରେ ସନ୍ତାପ |
ଛୁଆ ସହ ପିତାମାତା ପ୍ରେମ ଯେ ବିରାଟ,
ବୃଦ୍ଧକାଳେ ସେଇ ପ୍ରେମ ସାଜେରେ ବିଭ୍ରାଟ |
ପ୍ରେମର ବି ରହିଅଛି ବିଭିନ୍ନ ସ୍ୱରୂପ,
କୁଚିନ୍ତାଧାରାରେ ସିଏ ସାଜେରେ କୁରୂପ |
ପ୍ରେମ ନୁହେଁ ଆବେଗର ଅପ୍ରୀତି ମିଳନ,
ପ୍ରେମ ଅଟେ ଅତି ଆନନ୍ଦର ବିସ୍ଫୋରଣ |
ପ୍ରେମ ଅତି ଶକ୍ତିଶାଳୀ, ହାରମାନେନାହି,
ଅସମ୍ଭବ କାର୍ଯ୍ୟକୁ ଯେ ସମ୍ଭବ କରଇ |
ପ୍ରକୃତ ପ୍ରେମରେ ସଦା ତ୍ୟାଗ ରହିଥାଇ,
ପାଇବା ଆଶାରେ କେବେ ପ୍ରେମ ତିଷ୍ଠି ନାହିଁ |
ମାତାପିତା ପ୍ରେମ ସଦା ଅଟେ ଯେ ଅଗଣ୍ୟ,
ଆଉ ଯେତେ ପ୍ରେମ ସବୁ ସ୍ୱାର୍ଥ ମଧ୍ୟେ ପୂର୍ଣ୍ଣ |
ପ୍ରେମ କର ପ୍ରତି ଜୀବେ, ଭାବି ନାରାୟଣ,
ପ୍ରେମକୁ ଅନ୍ୟାର୍ଥେ ନ ଦିଅ କଦର୍ଯ୍ୟ ନାମ |
ପ୍ରେମ, ଶକ୍ତି, ଶ୍ରଦ୍ଧା ଆଉ ପ୍ରେମ ମୂଳେ ଶାନ୍ତି,
ଯେପରି କୁସୁମ ସହ ଭ୍ରମର, ପ୍ରଜାପତି |
ନିସ୍ଵାର୍ଥ ପ୍ରେମ ଯେ ଯୁଗେ ଯୁଗେ ଅମର,
ପ୍ରେମବିନା ଏ ସୃଷ୍ଟି ହେବ ଥରହର |
ପ୍ରେମ ଥାଉ ଜଗତର ପ୍ରତି ଜୀବଠାରେ,
ଜୀବନ ତା ବିତିଯାଉ ସଦା ସପ୍ରେମରେ |