ପ୍ରେମ

ପ୍ରେମ ଏକ ଅମିଳନ ପାରିଜାତ ଫୁଲ

ପ୍ରସ୍ପୂଟିତ ହୃଦୟ କାନନ

ପ୍ରେମ ପୁଣି ମନ ଦେଶେ କାଉଁରୀ ମନ୍ତର

ସାଉଁଟେ ସେ ସଜାଇ ସପନ

ପ୍ରେମ ଏକ ଅମାନିଆ ଚୁଲବୁଲ୍ ନଈ

ବହିଥାଏ ବନ୍ଧୁର ଦିଗନ୍ତ

ପ୍ରେମ ସତ୍ୟ କେଉଁ ଏକ ଅଜଣା ଇଲାକେ

ଫେରିବାର ରାସ୍ତା ଅନିଶ୍ଚିତ

ପ୍ରେମ ଏକ ଛନ୍ଦମୟ ମାଧୁରିମା ଗୀତ

ତୋଳିଥାଏ ରସର ରାଗିଣୀ

ପ୍ରେମ ମୈତ୍ରୀ ସୁଖ,ଶାନ୍ତି, ସ୍ନେହର ବନ୍ଧନ

ମରୁଭୂମେ ଖେଳେ ନିର୍ଝରିଣୀ

ପ୍ରେମ ସୁଧା ଜୀବନର ବିଷ ପାତ୍ରଟିରେ

ସ୍ବର୍ଗପ୍ରୀତି ଭରେ ପ୍ରାଣେ ପ୍ରାଣେ

ପ୍ରେମ ପୁଣି ଜଳାଏ ଯେ ଶାନ୍ତିର ମଶାଲ

ଅମା ନାଶେ ନବ ଜାଗରଣେ

ପ୍ରେମ କ୍ଷୁଧା ଯୌବନର ସିକ୍ତ ମଧୁବେଳେ

ଝରିଯାଏ ନିଃଶ୍ବାସ ଗନ୍ଧରେ

ପ୍ରେମ ତ ଶୃଙ୍ଖଳା ଏହି ବ୍ୟସ୍ତ ଜୀବନରେ

ଆଲିଙ୍ଗନ ଆପଣା ସ୍ବାଦରେ

ପ୍ରେମ ତିଷ୍ଟି ରହିଅଛି ଧରଣୀ ବୁକୁରେ

ଆନନ୍ଦର ଅସରନ୍ତି ମୋହ

ପ୍ରେମ ରଥେବିଜୟାଶ୍ରୀ ନର ବା ଦେବତା

ପାଇଛି ସେ ଲହୁ କେବେ ଲୁହ