ପ୍ରେମ ନୁହେଁ ପାପ
ପ୍ରେମ ନୁହେଁ ପାପ
ପ୍ରେମ ଏକ ଶାଶ୍ୱତ ଆବେଗିକ କ୍ରିୟା
ହୃଦୟ ତନ୍ତ୍ରୀରୁ ସୃଷ୍ଟ ସଙ୍ଗୀତ
ନିଃସୃତେ ସାତସୁରେ ଅମୃତର ଧାରା
କରିବାକୁ ଦୁଇ ମନ ପ୍ରୀତି ପୁଲକିତ l
ପ୍ରେମ ତ ଏକ ହୃଦୟର ପ୍ରତିଶୃତି
ସାତଜନ୍ମ ପାଇଁ ବନ୍ଧନର ଅଭିମନ୍ତ୍ର
ଭରେ ମନେ ପ୍ରୀତିର ନୂଆ ଅନୁଭୂତି
ଏକ ସର୍ତ୍ତ ବିହୀନ ବନ୍ଧନର ସୂତ୍ର l
ପ୍ରେମ ଦୁଇ ହୃଦୟର ବାର୍ତ୍ତାବହ
ଅକୁହା ଭାବନାର ମଧୁମୂର୍ଚ୍ଛନା
ଆଦିମ କାମନାର ରମ୍ୟ ଆଲେଖ୍ୟ
ନୁହେଁ ସ୍ୱପ୍ନ ଏକ ବାସ୍ତବ ବାସନା l
ନାରୀ-ପୁରୁଷ ମଧ୍ୟେ ସେତୁ ସମ୍ପର୍କର
ପ୍ରେମ ତାହା ଆକର୍ଷଣର ନିବିଡ଼ତା
ସ୍ୱତଃ ସ୍ଫୁରିତ ପ୍ରୀତି କରେ ଆପଣାର
ସାତରଙ୍ଗେ ଭରଇ ପ୍ରାଣ ପ୍ରାଚୁର୍ଯ୍ୟତା l
ପ୍ରେମ ସମଗ୍ର ସୃଷ୍ଟିର ଆଦ୍ୟ ଓଁ କାର
ଚିରନ୍ତନ ପବିତ୍ର ବନ୍ଧନର ମାୟା
ପ୍ରେମ ତ ଆୟୁଷର ଧାରା ସଂସାରର
ମନେଭରେ ଶାନ୍ତିରେ ବଞ୍ଚିବାର ରାହା l
ପ୍ରେମ ଏକ ହୃଦୟର ଅଧୀର ଉଚ୍ଛ୍ଵାସ
ସତେ କେଉଁ ଧୀର ଝରଣାର ଧାରା
ଭିଜାଏ ସେ ଦେହମନ ହୋଇ ପୁଲକିତ
ରୋମାଞ୍ଚିତ କରିବାକୁ ହୃଦୟର କାରା |
ଅନାବିଳ ପ୍ରେମ ଭରେ ସ୍ୱର୍ଗୀୟ ଅମୃତ
ଚିରନ୍ତନ ଅଭିଳାଷ ମଧୁରତା ଥାଏ
ସଙ୍ଗୀତର ମୂର୍ଚ୍ଛନାରେ ସେ ଅନୁରଣିତ
ଜୀବନରେ ସାତରଙ୍ଗ ଭରିଦେଇଯାଏ |
ପ୍ରେମ ଏକ ଛୋଟ ଶବ୍ଦ ହେଲେ ବି ବିଶାଳ
ବିଶ୍ୱକୁ ରଖିଛି ବାନ୍ଧି ଜାଳି ଆଶା ଦୀପ
ପୂଣ୍ୟଭରା ତଟିନୀ ସେ ଚିର ଛଳ ଛଳ
ବନ୍ଧନର ରଜ୍ଜୁ ମାତ୍ର ପ୍ରେମ ନୁହେଁ ପାପ |