ପ୍ରବାସୀ

ନିଜର ରାଜ୍ୟରେ ଚାକିରି ନ ପାଇ,

ଚାଲିଯାଇଥିଲେ ଦିନେ,

ମୁଠେ ଅନ୍ନ ପାଇଁ କିଛି ଅର୍ଥ ପାଇଁ,

ସବୁ କଷ୍ଟ ଚାପି ମନେ।

ପରିବାର ଛାଡି ଦୂର ଦେଶେ ରହି,

କରୁଛନ୍ତି ପରିଶ୍ରମ,

ସୂତାକଳ ହେଉ, ହେଉ ଇଟାଭାଟି,

କରୁଛନ୍ତି ତାଙ୍କ କର୍ମ।

ଅର୍ଥକୁ ଅପେକ୍ଷା କରି ରହିଛନ୍ତି,

ପିତାମାତା ପରିବାର,

ଟଙ୍କା ନ ମିଳିଲେ ସୁନା ସଂସାରଟା,

ହୋଇଯିବ ଛାରଖାର।

କେଇ ଟଙ୍କା ପାଇଁ କରିବାକୁ ପଡେ,

ରାତିଦିନ ପରିଶ୍ରମ,

ମନକଥା କେହି ବୁଝିବାକୁ ନାହିଁ,

ବୋଝ ଲାଗେ ଆଜି ପ୍ରାଣ।

ପରିବାର ଦୁଃଖ ଦେଖି ହୁଏନାହିଁ,

ସହିହୁଏ ନାହିଁ କଷ୍ଟ,

ପ୍ରଭୁ ବରଦାନ ଦୁର୍ମୂଲ୍ୟ ଜୀବନ,

ଅଚିରେ ହୋଇବ ନଷ୍ଟ....?