ବଂଶୀରେ
ବଂଶୀରେ
ତୋତେ ମୀରା ଖୋଜୁଛି ତୋତେ ରାଧା ଝୁରୁଛି
ଫେରିଆ ତୁ ଫେରିଆ ରେ ମୋହନ ବଂଶୀ
ତୋର ସେହି ସାତ ସୁର ଝୁରନ୍ତି ଗୋପୀକା
ତନୁ କ୍ଷୀଣ କରିଲାଣି ମାନିନୀ ରାଧିକା ।
ଯମୁନା ପୂଲିନେ ନାହିଁ ଲାକ୍ଷା ବୋଳା ପାଦ
ଦହିହାଣ୍ଡି ଭାଙ୍ଗୁନାହିଁ ଗୋପପୁର ସ୍ତବ୍ଧ
ଲବଣୀ ହେଉନି ଚୋରି ଗୋପ ବୃନ୍ଦାବନୁ
ଯଶୋଦା ଖୋଜନ୍ତି ଫେରିଆ କଳାକାହ୍ନୁ ।
ତୋ ନାମରେ ବସୁନାହିଁ ସଭା ଗୋପପୁରେ
ଫୁଟୁନି କଦମ୍ବ ଆଉ ନିତି ତୋତେ ଝୁରେ
ସୁଦାମା ମଧୁମଙ୍ଗଳ ସୁବଳ ସାଙ୍ଗରେ
ଗୋ ଗୋଷ୍ଠରୁ ଫେରୁନାହିଁ ବଉଳା ସଞ୍ଜରେ ।
ନିରବୀ ଯାଇଛି ଗୋପ ନାହିଁ ଖୁସି ଆନନ୍ଦ
ଶୁଭୁନାହିଁ ଗୋବିନ୍ଦର କଠଉର ଶବ୍ଦ
ମନମାରି ସୁକୁମାରୀ ଗୋପର ଦୁଲଣୀ
ସାଇତି ରଖୁନି ଆଉ ଘରେ ସରଲବଣୀ ।
କୁଞ୍ଜବନେ ଧାଉଁନାହିଁ ବିରହୀ ରାଧିକା
ତୋ ବିନା ଲାଗେନା ଭଲ ସବୁ ଆଜି ଫିକା
ଥରଟିଏ ଫେରିଆ ତୁ ବଜା ତୋ ମୁରଲୀ
ଜଡ଼ରେ ଚେତନଶକ୍ତି ଭରିଯାଉ ପୁଣି ।