ପ୍ରାଣ ହେଉ ଉଜ୍ଜୀବିତ

ବାଉନ ବଜାର ତେପନ ଗଳିର

ଐତିହ୍ଯ ନଗର କଟକ

ଉଜ୍ଜ୍ବଳ ସଂସ୍କୃତି ହୀରକ ପ୍ରଭାରେ

ମଣ୍ଡିତ ତା ମାଟି ପୁସ୍ତକ ।

ଅଛି ମୁକସାକ୍ଷୀ ଭଗ୍ନ ବାରବାଟୀ

ଗାଥା ପୂର୍ବ କୀର୍ତ୍ତି ସ୍ମରି

ଯୁଦ୍ଧ ଝଡଝଞ୍ଜା ଉତ୍ଥାନ ପତନ

ସ୍ମୃତି କେ ପାରିବ ଭୁଲି ।

ମହାନଦୀ ପଠା ଗୋଟି ଗୋଟି ପୃଷ୍ଠା

ଗଡଗଡି ନଦୀଘାଟ

ଉଜ୍ଜ୍ବଳ ଆମର ଅତୀତ ଗୌରବ 

ବଖାଣଇ ଶତମୁଖ ।

ବହିତ ଗଲାଣି ସମୟର ସ୍ରୋତ

କେତେ ମହାନଦୀ ପାଣି

ଉତ୍କଳ ସଂସ୍କୃତି ଧର୍ମ ପରମ୍ପରା

କଡ ଲେଉଟାଏ ପୁଣି ।

ରୋମନ୍ଥେ ପ୍ରାଣକୁ ତଅପୋଇ ସ୍ମୃତି

ବୋଇତର ବନ୍ଦାପନ

ଗୁଞ୍ଜି ଉଠେ ସ୍ମୃତି ଉତ୍କଳୀୟ କଣ୍ଠ

ଆକାମାବୈ ଉଚ୍ଚାରଣ ।

କାର୍ତ୍ତିକ ପୂର୍ଣ୍ଣମୀ ପ୍ରାତଃ ପ୍ରଭାତରେ

ପଟୁଆ ଡଙ୍ଗା ଭସାଇ 

ସ୍ବର୍ଣିମ ଅଧ୍ଯାୟ ଅତୀତର ସ୍ମୃତି

ଉଜାଗର ଥାଏ ହୋଇ ।

ଇଣ୍ଡୋନେସିଆର ସୁମାତ୍ରା ବୋର୍ଣ୍ଣିଓ 

ଯାଭା ଆଉ ବାଲିଦ୍ବୀପ

ଯାଉଥିଲେ ଆମ ଉତ୍କଳ ବଣିକ

କରିବାକୁ ନୌବାଣିଜ୍ୟ ।

ଲୋପ ପାଇଅଛି ସମୃଦ୍ଧ ଐତିହ୍ଯ 

ଭାବିଲେ ଲାଗଇ ଦୁଃଖ

ହେଉ ଗବେଷଣା ଚିନ୍ତନ ମନନ

ସଂସ୍କୃତି ରହୁ ସୁରକ୍ଷ ।

ଆୟୋଜିତ ହୁଏ ଯାକଜମକରେ

କଟକର ବାଲିଯାତ୍ରା

ଆଠଦିନ ବ୍ଯାପୀ ଚାଲଇ ଉତ୍ସବ

ସମାଗମ ଭବ୍ଯ ମେଳା ।

ହୁଏ ବିକାକିଣା ଆସବାବପତ୍ର 

ଘରୋଇ ଉପକରଣ 

ମିଳେ ହସ୍ତଶିଳ୍ପ ପ୍ରସିଦ୍ଧ ସୁଆଦ

ଠୁଙ୍କାପୁରି ଆଳୁଦମ ।

ବଞ୍ଚିଲେ ସଂସ୍କୃତି ସମାଜ ଜୀବନ

ଜାତି ହୁଏ ସମୁନ୍ନତ 

ଜୟ ଜଗନ୍ନାଥ ଶୁଭୁ ଶଙ୍ଖନାଦ

ପ୍ରାଣ ହେଉ ଉଜ୍ଜୀବିତ ।