ପଞ୍ଚତତ୍ତ୍ଵ

ସୃଷ୍ଟି ସରଜନା ଅନ୍ଧକାର ମଧ୍ୟୁ

ଉଜ୍ଜ୍ଵଳ ଜ୍ୟୋତି ପ୍ରକଟ

ସେଇ ଜ୍ୟୋତି ରେଖା ସୃଷ୍ଟି କର୍ତ୍ତା ପରା

ଆକାଶ ମଣ୍ଡଳ ଜାତ ।

ମରୁତ ଓ ଅଗ୍ନି, ଜଳ, ପୃଥ୍ବୀ ପୁଣି

ସୃଷ୍ଟି କ୍ରମରେ ଆସିଲେ

ପ୍ରଳୟ କାଳରେ ଓଲଟା ଧାଇଁବେ

ଗୁଣୀ ଏ କରିନ୍ତି ଭଲେ ।

ଏହି ପଞ୍ଚ ଭୂତେ ଶରୀର ଯେ ଗଢ଼ା

ପଞ୍ଚ ମହାଭୂତେ ଲୀନ

ଏ ପଞ୍ଚ ଶବ୍ଦଟି ଜୀବର ଜୀବନେ

ଶୁଭଙ୍କରୀ ପୁଣି ଶୁଣ ।

ପଞ୍ଚମ ସ୍ୱରରେ ବେଦ ଉଚ୍ଚାରଣ

ପଞ୍ଚଶସ୍ୟ, ପଞ୍ଚାମୃତ

ପଞ୍ଚ ପଲ୍ଲବ ଓ ପଞ୍ଚାମୃତ ପୁଣି

ପଞ୍ଚଗବ୍ୟ, ପଞ୍ଚ ରତ୍ନ |

ପଞ୍ଚକର୍ମ ଆଉ ପଞ୍ଚବେଦୀ ପୁଣି

ପଞ୍ଚ ଇନ୍ଦ୍ରିୟ ଯେ ସ୍ଥିତ

ପଞ୍ଚତତ୍ତ୍ଵ ପୁଣି ପଞ୍ଚ ଇନ୍ଦ୍ରିୟରେ

ହୋଇଛନ୍ତି ସମାହିତ |

ନାସିକାରେ ପୃଥ୍ବୀ କର୍ଣ୍ଣରେ ଆକାଶ

ଚର୍ମରେ ରହେ ମରୁତ

ଜିହ୍ବାରେ ଯେ ଜଳ ନୟନେ ଅନଳ

ଏ ପରା ଜ୍ଞାନୀଙ୍କ ମତ ।

ପଞ୍ଚତତ୍ତ୍ୱ ଆସି ଶରୀର ଆବୋରି

ପଞ୍ଚଇନ୍ଦ୍ରିୟେ ରହିଲେ

ଆତ୍ମାକୁ ଶରୀର କେନ୍ଦ୍ରବିନ୍ଦୁ କରି

ପ୍ରାଣ ପ୍ରତିଷ୍ଠା କରିଲେ ।

ପଞ୍ଚଭୂତେ ଗଢ଼ା ଏ ଆମ ଶରୀର

ପଞ୍ଚଭୂତେ ହେବ ଲୀନ

ଆତ୍ମା ଆକାଶକୁ ଗମନ କରିବ

ସର୍ବେ ନେବେ ନିଜ ସ୍ଥାନ |

ଶରୀର ଆବୋରି ହିଂସା, କ୍ରୋଧ ଧରି

ଷଡରିପୁ ଙ୍କ ପ୍ରଭାବେ

ମାର୍ଗହୀନ ହୋଇ ଭ୍ରମି କିବା ଲାଭ

ସ୍ଥିତି ଆଣିବା ସ୍ୱଭାବେ ।

ଆପଣା କର୍ମକୁ ସୁକର୍ମେ ସଜାଇ

ତତ୍ତ୍ଵ ସାଧନ କରିଲେ

ତତ୍ତ୍ଵ ସାଧନର ଗୁରୁ ତତ୍ତ୍ଵ ପରା

ସର୍ବାଗ୍ରେ ନାମ କରିଲେ ।

ମନ୍ତ୍ରତତ୍ତ୍ଵ ଆଉ ମନସ୍ତତ୍ତ୍ୱ ସଙ୍ଗେ

ଦେବତତ୍ତ୍ବ ଧ୍ୟାନ ତତ୍ତ୍ଵ

ଏହି ପଞ୍ଚ ତତ୍ତ୍ଵ ସାଧନରେ ପ୍ରାଣୀ

ହୁଏ ବନ୍ଧନରୁ ମୁକ୍ତ । 

ଏହି ପଞ୍ଚତତ୍ତ୍ୱ ସାଧନା କରିଲେ

ଦୁଷ୍କୃତି ହୁଏ ଖଣ୍ଡନ

ସତ୍ୟ, ଶାନ୍ତି ପୁଣି ସଦାଚ଼ାର ନୀତି

ସୁଗୁଣରେ ହୁଏ ପୂର୍ଣ୍ଣ ।

ସୁଗୁଣେ ପୂର୍ଣ୍ଣତା ଅଟେ ପୁଣ୍ୟଦାତା

 ମହାଲକ୍ଷ୍ୟ ଜୀବନର

ପଞ୍ଚଭୂତେ ଗଢ଼ା ପଞ୍ଚଭୂତେ ଲୀନ

ସଂସାର ପରା ଅସାର |

ପ୍ରାଣ ଥାଉ ଥାଉ ପ୍ରାରବ୍ଧ ଗଢ଼ିବା

କର୍ମ ଯୋଗ କୁ ବୁଝିବା

ପଞ୍ଚମହାଭୂତେ ମିଶିବା ତ ଦିନେ

କିମ୍ପା ଅହଂକାରୀ ହେବା |