ପିଣ୍ଡରୁ ବ୍ରହ୍ମାଣ୍ଡ

ପିଣ୍ଡରୁ ବ୍ରହ୍ମାଣ୍ଡ ହୋଇଛି ଉଦ୍ଭବ 

ଜୀବଜଗତର ସୃଷ୍ଟି 

ସ୍ରଷ୍ଟାଙ୍କର ଏଇ ସୁନ୍ଦର ରଚନା 

କରିଛି ଆଶିଷ ବୃଷ୍ଟି ll

ଏ ବିଶ୍ୱ ବ୍ରହ୍ମାଣ୍ଡ ଅଟେ ମାନଦଣ୍ଡ 

ଜୀବଜଗତର ଲାଗି 

ତା'ର ମେରୁଦଣ୍ଡ ହେଲେ ଖଣ୍ଡ ଖଣ୍ଡ 

ଆତଙ୍କ ଉଠିବ ଜାଗି ll

ଜୀବ ପରମର ମଧୁର ସୃଜନୀ 

ଅଟେ ଏ ସୁନ୍ଦର ଧରା 

ପ୍ରକୃତି କୋଳରେ ଏ ଜୀବଜଗତ 

ଉତ୍କର୍ଷରେ ଆତ୍ମହରା ll

ଜୀବଜଗତର ଜୀବନ ସମ୍ଭବ 

ଅଟେ ଏ ବିଶାଳ ମହୀ 

ସକଳ ଜୀବର ଜୀବନ ଧାରାକୁ 

ବକ୍ଷରେ ଚାଲିଛି ବୋହି ll

କେତେ ନଦ ନଦୀ ବିଶାଳ ଜଳଧି 

ପ୍ରବାହିତ ଯହିଁ ନିତ୍ୟ 

ପ୍ରକୃତିର ଦାନେ ଏ ଜୀବଜଗତ 

ଚିର ଋଣୀ କୃତ୍ୟ କୃତ୍ୟ ll

ପିଣ୍ଡରୁ ବ୍ରହ୍ମାଣ୍ଡ ବିସ୍ମୟ ଭୂଖଣ୍ତ

ଅଟେ ଏ ସୁନ୍ଦର ଧରା 

ଜୀବ ପରମର ସମ୍ପର୍କର ସେତୁ 

ବସୁମତୀ ବିଶ୍ଵମ୍ଭରା ll

ପିଣ୍ଡରୁ ପରାଣ ହୋଇଛି ଉନ୍ମେଷ 

ବ୍ରହ୍ମାଣ୍ଡ ହୋଇଛି ଜାତ 

ଜୀବନ ଯେଉଁଠି ହୋଇଛି ସମ୍ଭବ 

ବ୍ରହ୍ମମୟ ଏ ଜଗତ ll

ବ୍ରହ୍ମରୁ ଶବଦ ଶ୍ରୁତି ହୀନ ନାଦ 

ଶୂନ୍ୟରେ ଯାଉଛି ମିଶି 

ନିତ୍ୟ ନିରନ୍ତର ଚାଲିଛି ସତ୍ୱର 

ଅଜ୍ଞ ଏ ଜଗତବାସୀ ll