ଅବ୍ୟକ୍ତ କୋହ

ସନାତନ ବାବୁ ଥିଲେ ବଡ଼ ଅଫିସର

ପାଞ୍ଚ ବର୍ଷ ହେଲା ନେଇଥିଲେ ଅବସର |

ବାପ ଜେଜେ ଅମଳରୁ ଗାଆଁ ଜମିଦାର

ଧନ ଧାନ୍ୟ ପୂର୍ଣ୍ଣ ଘର ଲକ୍ଷ୍ମୀଙ୍କ ଭଣ୍ଡାର |

ପର ଦୁଃଖେ ଝରୁଥିଲା ନୟନରୁ ନୀର

ଦାନୀ ମାନୀ ଚଉଦିଗେ ଥିଲାତ ଖାତିର |

ପତ୍ନୀ ସରସ୍ୱତୀ ଦୟା କ୍ଷମା ବାରିଧର 

ଅତନୁ ଶାନ୍ତନୁ ନାମେ ଦୁଇଟି କୁମର |

ଦୁଇହଜାର କୋଡିଏ ଜୁଲାଇ ପନ୍ଦର

କରୋନା ରେ କବଳିତ ହେଲେ ଗୁଣାକର |

କୋଭିଡି ଡାକ୍ତର ଖାନା ନାମ ମାଧପୁର

ରହିଲେ ସଙ୍ଗରୋଧରେ ହୋଇଲେ ଆତୁର |

କି ଅସାଧ୍ୟ ଏ ବେମାରୀ କେଡ଼େ ଭୟଙ୍କର 

ଛୁଇଁବାକୁ ଡରୁଛନ୍ତି ଆତ୍ମୀୟ ସୋଦର |

କାଲି ହୋଇଥିଲା ଯିଏ ପ୍ରିୟ ସଭିଙ୍କର 

ବେଢ଼ି ଚଉପାଶେ ବନ୍ଦୁଥିଲେ ଯା ପୟର |

ନିଜରକ୍ତ ପୁତ୍ର ପତ୍ନୀ କରିଲେ ଅନ୍ତର 

ଜୀବନ୍ତ ସମାଧି ଏତ ସାହା ବିଶ୍ୱେଶ୍ୱର |

ଅବ୍ୟକ୍ତ କୋହକୁ ଚାପି ହୃଦୟ ମଧ୍ୟର

ଜୀବନ ଦର୍ଶନ ପଢୁଥିଲେ ନିରନ୍ତର |

ସ୍ଵାର୍ଥେ ଏ ଜଗତ ଅନ୍ଧ କେ ନୁହେଁ କାହାର

ଏଇତ ସଂସାର କେହି ନାହାନ୍ତି ପାର୍ଶ୍ଵର |

ଆହା କହିବାକୁ ଏଠି ସାହା ହିଁ ଡାକ୍ତର 

ସେବିକାଙ୍କୁ ଧନ୍ୟବାଦ ଲାଗନ୍ତି ନିଜର |

କାହିଁକି ଆସିଛୁ ଧନ କିନେବୁ ସଙ୍ଗର

ମଲେ ଜେସିପି କାଢ଼ିବ ଶବକୁ ତୋହର |

ପର ଉପକାର ପୁଣ୍ୟ ବ୍ରତ ନାରଖାର

ଅବ୍ୟକ୍ତ କୋହକୁ କିଏ ବୁଝିବ ସେଠାର |