ପିଲାଙ୍କ ପ୍ରଶ୍ନ
ପିଲାଙ୍କ ପ୍ରଶ୍ନ
ରେଳଗାଡିଟିଏ ଛୁକ୍ ଛୁକ୍ ହୋଇ
ଯାଉଅଛି ଗଡି ଗଡି ।
ପିଲାଏ ଦେଖିଲେ ପ୍ରଶ୍ନ ପଚାରିଲେ
କିଏ ଗଢିଲା ଏ ଗାଡି ।।
ବସିଲେ ରେଳରେ ପିଲାମାନେ ଯେବେ
ଗାଡି ଧାଇଁଲା ଆଗକୁ ।
ପିଲାଏ ଦେଖିଲେ ଗଛ ଗାଡି ଘୋଡା
ସବୁ ଧାଇଁଲେ ପଛକୁ ।।
ପଚାରିଲେ ପିଲେ ଆମେ ତ ଦେଖିଲୁ
ଗଛ ଗାଡି ଘୋଡାମାନେ ।
ପଛକୁ ଧାଇଁଲେ ରେଳ ଧାଉଁଥିଲା
ଆଗକୁ କହ କେସନେ ।।
ରେଳ ଗଡିଗଲା ଆଗକୁ ଆଗକୁ
ଆଗରେ ସେ ଠିଆ ହେଲା ।
ଗଛ ଗାଡି ଘୋଡା ଧାଉଁଥିଲେ ସବୁ
କୁଆଡେ କିଏ ସେ ଗଲା ।।
ଜହ୍ନମାମୁଁ ବୋଲି କହନ୍ତି ଯାହାକୁ
କେଉଁଠାରେ ତାଙ୍କ ଘର ।
ଦିନରେ କୁଆଡେ ଯାଉଛନ୍ତି ସିଏ
ଦିଅ ଏ ପ୍ରଶ୍ନ ଉତ୍ତର ।।
ସୁରୁଜ ଦିନରେ ଦେଖାଯାଉଛନ୍ତି
ରାତି ହୋଇଗଲେ ସିଏ ।
କେଉଁଠି ରହନ୍ତି କଅଣ କରନ୍ତି
ଏ ଉତ୍ତର ଦିଅ କିଏ ?
ଘଡଘଡି ମେଘ କିଆଁ ସିଝାଉଛି
ମାରେ କିଆଁ ଚଡଚଡି ।
ବିଲୁଆ ପାଟିରେ ନିଆଁ ଦିଶେ କିଆଁ
ପକାଇଲେ ସିଏ ରଡି ।।
କେତେ ପ୍ରଶ୍ନ ସବୁ ପଚାରନ୍ତି ପିଲେ
ଆସେ ଯା ତାଙ୍କ ମନକୁ ।
ଉତ୍ତର ସବୁ ଏ ପ୍ରଶ୍ନର କହିବ
ଆସୁଛି ଯାହା ତୁମକୁ ।।