ଚାଲ ଯିବା ବୁଲି ଶୀରିମନ୍ଦିର
ଚାଲ ଯିବା ବୁଲି ଶୀରିମନ୍ଦିର
କୁନା ମୁନା ରୀତା ସୀତା ସମୀର
ଚାଲ ଯିବା ବୁଲି ଶୀରିମନ୍ଦିର
ଦେଖିବା ସେଠାରେ ତିନି ଦିଅଁକୁ
ଧଳା କଳା ହଳଦିଆ ମୁଖକୁ ।
ଧଳା ରଙ୍ଗେ ବଳଦେବ ଅଟନ୍ତି
କଳା ରଙ୍ଗ ଜଗନ୍ନାଥ ବୋଲନ୍ତି
ହଳଦିଆ ବେଶେ ସୁନା ଭଉଣୀ
ଢ଼ାଳୁଛନ୍ତି ବସି କୃପା ଚାହାଣୀ ।
ଶୀରିକ୍ଷେତରରେ ତିନୋଟି ଫୁଲ
କିଏ ସେ ହୋଇବ ତାଙ୍କରି ତୁଲ
ପତିତ ପାବନ ନାଲିଆ ନେତ
ଉଡ଼ୁଛି ଦେଖିବା ଆମେରେ ମିତ ।
ଦରିଆ କୂଳରୁ ବୁଲି ଆସିବା
ଅବଢ଼ା ଡ଼ାଲିକୁ ତୁଣ୍ଡେ ମାରିବା
ବାଇଶି ପାହାଚେ ଆସିବା ଗଡି
ଗରୁଡ଼ ଖୁମ୍ବକୁ ଧରିବା ଭିଡ଼ି ।
ନରେନ୍ଦ୍ର ଜଳରେ ବୁଡ଼ ପକାଇ
ଆସିବା ସଭିଏଁ ନିର୍ମାଲ୍ୟ ପାଇ
ବଡ଼ଦାଣ୍ଡ ରେଣୁ ହୋଇବା ବୋଳି
ଜଗା ନାମ ଗାଇ ମାରିବା ତାଳି ।
ଆସ ପିଲାମାନେ ଅତି ସ୍ନେହର
ଆସ ଯିବା ବୁଲି ଶୀରିମନ୍ଦିର
କାଳିଆ ନନାର ମହାପ୍ରସାଦ
ଖାଇଲେ ପରାଣ ହେବ ଆମୋଦ ।