ସବୁ ତୁମରି ଦାନ

.

              *ସବୁ ତୁମରି ଦାନ*

              *ଅମରନାଥ ବାରିକ୍*

ଏ ମର୍ତ୍ତ୍ୟ ମଣ୍ଡଳେ ଯାହା ମୁଁ ଦେଖୁଛି

       ସକଳ ସମ୍ପଦ ତୁମରି ଦାନ

ତୁମ ଆଦେଶରେ ଋତୁ ଆତଯାତ

      ତୁମ ଇଙ୍ଗିତେ ହୁଏ ରାତି ଦିନ ।

ଫୁଲ ଫଳ ଲତା ସୁନ୍ଦର ଏ ଧରା

      ତୁମରି ଭିଆଣ ହେ ନାରାୟଣ

ଯାହା ଆବଶ୍ଯକ ସବୁ ଖଞ୍ଜିଦେଲ

     ପୁଲକରେ ଭରେ ଏ ମନ ପ୍ରାଣ ।

ପ୍ରାଣୀଙ୍କ ମଧ୍ୟରେ ସର୍ବଶ୍ରେଷ୍ଠ ବୀଜ

       ଦୁର୍ଲ୍ଲଭ ମାନବ ଜାତିଟି ଜାଣ

ତନ୍ମଧ୍ୟରେ ମୋତେ ଗଢ଼ିଲ ହେ ପ୍ରଭୁ

       ଦେଇ ସତ ରଜ ତମ ତ୍ରିଗୁଣ ।

ଲଭିଲି ସାର୍ଥକ ପିତା ନାମେ ପୁଣି

        ସୁଝିବି କିପରି ତୁମରି ଋଣ

ଧନ୍ୟକଲ ମୋତେ ହେ ପରମପ୍ରଭୁ

       ଧନ୍ୟ ଧନ୍ୟ ତୁମ ପ୍ରଭୁତ୍ଵ ପଣ ।

ଚୌରାଶି ନର୍କରୁ ମୁକ୍ତି ହେବା ପାଇଁ

      ଯାଚିଲ କୋଳରେ କନ୍ୟା ସନ୍ତାନ

କନ୍ୟାଦାନ ସଦା ମହତ ସଂସାରେ

       ଯୁଗେ ଯୁଗେ ରହିଅଛି ବିଧାନ ।

ମାଘ କୃଷ୍ଣପକ୍ଷ ଅମୃତ ବେଳାରେ

         ଜନମ ନକ୍ଷତ୍ର ଦେବଗଣଟି

  ତିଥି ପ୍ରତିପଦ ମିଥୁନ ରାଶିରେ

      ପ୍ରାତଃ ନ ତିରିଶ ରବିବାରଟି ।

ଦକ୍ଷ ପ୍ରଜାପତି -ଙ୍କର ବହୁ କନ୍ୟା

       ସେଥିରୁ ଅଦିତି ନାମଟି ଭିନ୍ନ

ଏ ନାମଟି ଯହିଁ ପୁରାଣୁ ଆନୀତ

       ରଖିବାକୁ ତହିଁ ବଳିଛି ମନ ।

ପବିତ୍ରତା ଏହି ନାମରେ ରହିଛି

    ତେଣୁ କନ୍ୟା ନାମ ଦେଲୁ ଅଦିତି

ଫେସନ ଯୁଗର ନାମ ପରିହରି

      ଆପଣାଇ ଆଧ୍ୟାତ୍ମିକତା କତି ।

ଭଜୁଥିଲେ ରାମ କୃଷ୍ଣ ରାଧା ନାମ

       ନରହିବ କେବେ ଶମନ ଭୟ

ହେ ପରମ ପିତା ଜଗତ ଈଶ୍ୱର

     ଥାଉ ତୁମ ପାଦେ ମୋହରି ଲୟ ।

ଗ୍ରା/ପୋ-କୟାଁ, ଥା-ମଙ୍ଗଳପୁର, ଜି-ଯାଜପୁର

      ଓଡ଼ିଶା, ପିନ୍ ନମ୍ବର - ୭୫୫୦୧୧

ଦୂରଭାଷା - ୯୫୪୦୩୦୮୦୯୫ (ନୂଆଦିଲ୍ଲୀ)