ଫୁଙ୍ଗୁଳା ଶରୀର ବୁଲା ଫକୀର

ଫୁଙ୍ଗୁଳା ଶରୀର ବୁଲା ଫକୀର ହେ

   ବୁଲୁଥିଲ ଧରି ଲାଠି

ସଂଯମତା ଗୁଣେ ଶିଖେଇ ଯେ ଥିଲ

  କେହି ନଖଟନ୍ତି ବେଠି।

ଅହିଂସା ପଥର ପଥ ପ୍ରଦର୍ଶକ

    ସତ୍ୟ ନ୍ୟାୟ ଧର୍ମ ଗୁଣ

ଦେଖି ହରିଶ୍ଚନ୍ଦ୍ର ନାଟକ ଟି ପୁଣି

   ଦାନ ଗୁଣେ ମହାମାନ୍ୟ।

ସତ୍ୟର ପୂଜାରୀ ଧର୍ମ କୁ ବିଚାରି

   ସହୁଥିଲ ଯେ ଯାତନା

ପୁରାଣ ସାହିତ୍ୟ ଇତିହାସ ଗାଥା

   ପଢି, ଭୁଲିଛ ଲାଞ୍ଛନା।

ଦରଦୀ ମନରେ ସ୍ନେହ ସମ୍ପର୍କ ରେ

    ବୁଲିଲ ଭାରତ ବର୍ଷ

ବୁଣିଦେଲ କାନେ ଅହିଂସା ମନ୍ତ୍ରଟି

    ଭରିଗଲା ଯେ ଉତ୍କର୍ଷ।

ଦେଶ ପ୍ରେମ ଭାଷା ସିଞ୍ଚି ଦେଲ ହୃଦେ

     ସ୍ୱାଧୀନତା ଭାବ ଭଙ୍ଗୀ

ଭାରତ ମାଆ ର ହେ ବୀର ସନ୍ତାନ

    ଦେଶ ପ୍ରେମ ଅନୁରାଗୀ।

ତୁମରି ଆଦର୍ଶ ରଖିବାକୁ ହୃଦେ

     ଦିଅ ପରାମର୍ଶ ବାପୁ

ସ୍ଖଳିତ ସମାଜ ସୁଧୁରି ଯିବାକୁ

    ହରିଦିଅ ହୃଦୁ ରିପୁ।

ଆହେ ଆର୍ଯ୍ୟ ସନ୍ଥ ଦେଖାଅ ସୁପଥ

     ସ୍ଵଛତାର ସେହି ମାର୍ଗ

ସତ୍ୟ ନ୍ୟାୟ ଧର୍ମେ ଚଳିବାକୁ ହେବ

     ରହିଥିବ ଅନୁରାଗ।

ଫୁଙ୍ଗୁଳା ଶରୀର ଦେଖିବାକୁ ମନ

    ରହିଛି ହୃଦରେ ଆଶା

ଲାଠି ଧରି ବାପୁ ଆସ ଥରେ ବୁଲି

   ନକର ଆଉ ନିରାଶା।