ଫଟୋ ବଦଳିଲା

:ଜେଜେ ଦେଇଥିଲେ ଜଗନ୍ନାଥ ଫଟୋ ଟାଙ୍ଗିଥିଲି ପଢାଘରେ,

ବଡ଼ ହେବାପରେ ବାପା-ମାଆ ଫଟୋ ରଖିଥିଲି ଟେବୁଲରେ ।

ଯୁବକ ହେବାରୁ ନିଜ ହିରୋମାର୍କା ଫଟୋ ବାନ୍ଧି ରଖିଦେଲି,

ପୁରୁଣା ଲାଗିଲା ବାପା-ମାଆ ଫଟୋ ତାକୁ ଖୋଲି କାଢିଦେଲି ।

ବାହାହେଲା ପରେ ସୁନ୍ଦରୀ ପତ୍ନୀର ଫଟୋ ନେଲା ମୋର ଜାଗା,

ଦୁଇବର୍ଷ ପରେ ମନ କହିଦେଲା କୁନିଝିଅ ଫଟୋ ଲଗା ।

ଚାରିବର୍ଷ ପରେ ପୁଅ ଜନମିଲା ଫଟୋ ତା'ର ଉଠେଇଲି,

ସବୁଯାକ ଫଟୋ ହଟେଇ ଦେଇ ମୁଁ ପୁଅ ଫଟୋ ଲଗେଇଲି ।

ପୁଅ ବଡ଼ହେଲା ଝିଅ ବାହାହେଲା ନାତୁଣୀ ପାଇଲି କୋଳେ,

ନାତୁଣୀର ଫଟୋ ଉଠେଇ ରଖିଲି ଟେବୁଲର କାଚତଳେ ।

ନାତି ଜନମିଲା ଛାତି ଫୁଲିଗଲା ଫଟୋ ତା'ର ଉଠେଇଲି,

ପୁରୁଣା ଫଟୋକୁ ସବୁ କାଢିଦେଇ ନାତି ଫଟୋ ସଜେଇଲି ।

ନାତି ବଡ଼ହେଇ ବିଦେଶକୁ ଗଲା ତା' ଫଟୋକୁ ଦେଲିକାଢି,

ଜଗନ୍ନାଥ ଫଟୋ କାନ୍ଥରେ ଝୁଲେଇ ପୂଜାକରୁ ବୁଢା-ବୁଢୀ ।

#ସିଧାକଥା