ଫୋଟୋ ଆମ ପରିବାରର
ଫୋଟୋ ଆମ ପରିବାରର
କାଚରୁ ଭଲକରି
ଅଳନ୍ଧୁ ପୋଛିଲେ
ସମସ୍ତଙ୍କୁ ଗୋଟି ଗୋଟି
ଭଲକରି ଚିହ୍ନି ହେବ
ପୁରୁଣା ସ୍ମୃତିବି ମନେପଡ଼ିବ ।
ଆଗ ଧାଡିରେ
କାଠ ଚଉକିରେ ଯିଏ ବସିଛନ୍ତି
ସେ ମୋ ଜେଜେ, ଜେଜି ମା
ଯିଏ ଆରପାରିକୁ ଚାଲିଗଲେଣି
ଆଜିକୁ ୧୦ବର୍ଷ ହେଲାଣି
ମୋତେ ଯେତେବେଳେ
୨୨ବର୍ଷ ହୋଇଥିଲା ।
ଜେଜି ମା କାନ୍ଧରେ
ଯିଏ ହାତ ପକାଇଛି
ସେ ଜେଜି ମା’ଙ୍କ ସାନ ଭଉଣୀ
ସେଦିନ ଆସିଥିଲେ ଆମ ଘରକୁ
ମୋ ପୁଅ ଏକୋଇସା ତ୍ରିନ୍ନାଥ ମେଳାକୁ ।
ଆଉ ଜେଜେଙ୍କ
ପାଦ ଛୁଇଁ ଆଣ୍ଠୁମାଡି ଯିଏ ବସିଛନ୍ତି
ସିଏ ମୋ ବାପା ବୋଉ
ଘରର ବଡ ପୁଅ ବୋହୂ ଭାବରେ
ଜେଜେ ବାପାଙ୍କ ଭାରି ଗେହ୍ଲା ।
ସଭା ପଛରେ
ଆମେ ତିନି ଭାଇ
ଚାରି ଭଉଣୀ
ମୋ ସ୍ତ୍ରୀ ଓ ପୁଅ ।
ଏବେ ସମସ୍ତେ
ଯିଏ ଯାହା କାମରେ ବ୍ୟସ୍ତ
ଏକାଠି ହେବା ଭାରି କଷ୍ଟ
ତେବେ ଫୋଟୋରେ
ଯେତେ ବହଳ ଆଳନ୍ଧୁ ଲାଗୁ
ସେ ମଧୁର ମୁହୂର୍ତ୍ତକୁ
ଏବେବି ମଳିନ କରିପାରେନା ।