ଫଗୁଣ ଆସିଲା

ଫଗୁଣ ଆସିଲା ବଉଳ ବାସିଲା

     କୋକିଳ ଡାକିଲା ଡାଳେ,

 ଧରା ପୃଷ୍ଠ ସତେ ମହମହ ବାସେ

       ଉପମା ନାଇଁ ଯାରେ ।

ଫୁଲରେ ଫୁଲରେ ସଜେଇ ହୋଇଛି

      ମା ମାଟି ଧରା ଭୂଇଁ,

 ତା ଚତୁ ରୂପ କାନ୍ତି ସମାନେ   

      ହେବ କି ସ୍ବର୍ଗ ଭୂଇଁ ।

      

ରଙ୍ଗରେ ରଞ୍ଜିତ ଧରା ପୃଷ୍ଠ ସତେ

      ଲାଗେ ମନ ମୁଗ୍ଧକର,

ସେହି ଶୋଭା ତାର ଦ୍ଵିଗୁଣ କରନ୍ତି

      ପରବ ଉତ୍ସବେ ନର ।

 ପରବେ ସତେ ହୋଲିକା ଦହନ

         ବସନ୍ତ ପବନ ମଧ୍ୟେ,

 ସୂଚାଇ ଦିଏ ସତ୍ୟ ବିଜୟ   

        ଧରାପୃଷ୍ଠେ ଯୁଗେ ଯୁଗେ ।

     

ରଙ୍ଗ ର ପରବ ଦୋଳ ଯାତ ସତେ

     ରଙ୍ଗାଏ ଧରା ପୃଷ୍ଠ,

 ରଙ୍ଗରେ ରଙ୍ଗରେ ବାନ୍ଧି ଦିଏ ସତେ  

     ଭାଇଚାରା ର ବନ୍ଧ ।

କାହ୍ନୁ ରାଜା ରଙ୍ଗେ ରଙ୍ଗେଇ ଯାଏ 

    ପ୍ରେମ ମୟୀ ରାଧାରାଣୀ,

 ଢୋଲ ନିଶାନ ବାଜା ବାଦନେ   

      ଦୁଲୁକେ ଗୋପ ଭୂଇଁ ।

ହୋଲିର ରଙ୍ଗ,ରଙ୍ଗର ହୋଲି

   ଫଗୁଣର ଦୋଳ ଯାତ,               

ଶିଖାଇ ଯାଏ ଆମେ ସଭିଏଁ

       ଭାଇ ବନ୍ଧୁ ସଖା ମିତ ।