ଫେରି ଆସ ତୁମେ

ଫେରି ଆସ ତୁମେ ସ୍ୱପ୍ନ ରାଇଜରୁ

ଛାଡି ଅଭିମାନ କଳା

ତୁମ ବିନା ପ୍ରିୟା ନିରବେ ଗୁମୁରେ

ହୃଦୟର ପାନ୍ଥଶାଳା ।

ବିରହ ନିଆଁର ଶୀତଳ ସ୍ଫୁଲିଙ୍ଗ

ଦଗ୍ଧୀଭୁତ କରେ ପ୍ରାଣ

ପାଉଁଶ ତଳେ ମୋ ସ୍ମୃତି ଖୋଜିବାକୁ

ଫଗୁଣ ଦେଇଛି ରାଣ ।

ଶୀତ ବିଞ୍ଚେ ମନେ ବୈଶାଖୀର ଝାଞ୍ଜି

ବସନ୍ତେ ଶ୍ରାବଣୀ ଝଡ଼

ଲୁହ ଭିଜା ରାତି ଲାଗେ ଅସରନ୍ତି

ସୁଖ ଲେଉଟାଏ କଡ଼ ।

ଫେରି ଆସି ତୁମେ ଫେରାଇ ଦିଅ ଗୋ

ମଧୁ ବୋଳା ସେହି ସ୍ପର୍ଶ

ଭୋଗିବାକୁ ଦିଅ କୁଟୀଳ ବନ୍ଧନେ

ପ୍ରୀତି ଛନ୍ଦା କାରାବାସ ।

ହୃଦୟ ପରିଧି ପ୍ରସାରଣ କଲେ

ଅବଶ୍ୟ ପାରିବ ଦେଖି

ପ୍ରେମ ପଞ୍ଜିକାରେ ତୁମ ସହ ମୋର

କୁଣ୍ଡଳୀ ଦେଇଛି ଲେଖି ।

ଜୀବନଟା କେତେ ଦୁର୍ବିସହ ଲାଗେ

ପାରିବନି ତୁମେ ଭାବି

ମନ ଆଇନାରେ ଲୁଚାଇ ଦେଖୁଛି

ତୁମର କଳ୍ପନା ଛବି ।

ଗୋଲକଧନ୍ଦାର ଦୋଛକିର ଦ୍ଵନ୍ଦ

ତୁମକୁ ଛାଡ଼ୁନି ବାଟ

ଫେରି ଆସ ପ୍ରିୟା ନିର୍ବିକାର ପ୍ରାୟେ

ମିଶିଯାଉ ମନ ଫାଟ ।