ପୌରୁଷ

କିଏ କେଉଁ କୁଳେ ଜନମ ଲଭିବ

କିଏ ତା କହି ପାରିବ

ପୂରୁବ ଜନମ କରମ ଫଳରେ

ଜୀବର ଜନମ ହେବ ।

ପୁରୁଷାର୍ଥ ପାଇଁ ଯତନ କରିଲେ

ପୌରୁଷ ଜାଗ୍ରତ ହେବ

ପୌରୁଷ ଜାଗ୍ରତ ହୋଇଲେ

ତୁମକୁ ରତନ ପ୍ରାପତ ହେବ ।

ପୁରୁଷାର୍ଥ ବଳେ କାର୍ଯ୍ୟ ସିଦ୍ଧି ହୂଏ

ତାହା ବିହୀନେ ଅସିଦ୍ଧି

ପୁରୁଷାର୍ଥ ବିନା ଖାଲି ମନୋରଥେ

କାର୍ଯ୍ୟ କି ହୋଇବ ସିଦ୍ଧି ।

ସିଂହଟିଏ ଯଦି ଶୋଇ ରହିଥିବ

ପୁରୁଷାର୍ଥ ନ କରିବ

ଜାଣିଶୁଣି ତାର ମୁଖରେ କି ଅବା

ମୃଗଟି ଆସି ପଶିବ ।

ପୁରୁଷାର୍ଥ କଲେ ନିରନ୍ତର ନିଶ୍ଚେ

କର୍ମ ଅନୁସାରେ ତୋର

ଫଳ ଲାଭ ହେବ କର୍ମଫଳ ଆଶା

ନ ରଖ କେବେ ମନର ।

ପୌରୁଷ ବଳରେ ରତନ ମିଳିବ

ନାହିଁ ଏଥିରେ ସନ୍ଦେହ

ପୁରୁଷାର୍ଥ କରି ରତ୍ନ ନ ମିଳିଲେ

ଦୋଷ ନିରୂପଣ ଥୟ।

କି ଦୋଷ ରହିଲା ସେ ପୁରୁଷାର୍ଥରେ

କଲେ ତାର ପ୍ରତିକାର

ପୁରୁଷାର୍ଥ ବଳେ ସାର୍ଥକ ହୋଇବ

ନିଶ୍ଚିତ କର୍ମ ତୁମର ।

ଦଇବ ହାତରେ ଜନମ ରହିଛି

ନିଜ ହାତେ ପୁରୁଷାର୍ଥ

ପୌରୁଷ ବଳରେ ସର୍ବ ସିଦ୍ଧି ହୁଏ

ଏହା ସଦା ସୁବିଦିତ ।