Library
ପାଉଁଶ ତଳର ସ୍ୱପ୍ନ
ପାଉଁଶ ତଳର ସ୍ୱପ୍ନ
ଦାମ ବାବୁଙ୍କର ପୁଅ ନୀଳମଣି
ସେନାରେ କରେ ଚାକିରୀ
ଦୁଇ ବର୍ଷ ହେଲା ବିଭା ହୋଇଥିଲା
ପତ୍ନୀଟି ଭାରି ସୁନ୍ଦରୀ |
ସୀମାରେ ଅରାତି ସହିତ ସମରେ
ସହିଦ ହୋଇଲା ସିଏ
ନିରୁପମା ସାତ ମାସ ଗର୍ଭବତୀ
ଏ ଦୁଃଖ ସହିବ କିଏ |
ନବ ବିବାହିତା ବିଧବା ରମଣୀ
ସ୍ୱାମୀର ସନ୍ତକ ଧରି
ଶାଶୁଘରେ ଅତି ଦୁଃଖରେ ରହିଲା
ଅଶୁଭ ଭାଗ୍ୟ ଆଦରି |
ଶାଶୁ ଶ୍ୱଶୁରଙ୍କ ଅନ୍ତେ ତାର ଦୁଃଖ
ବେଳୁ ବେଳ ଗଲା ବଢ଼ି
ପାଞ୍ଚ ବରଷର ପୁଅଟିକୁ ଧରି
ଘର କୋଣେ ଥାଏ ପଡ଼ି |
ସରିଗଲା ଧନ ଦଶଦିଗ ଶୂନ୍ୟ
ଚାକିରୀ କରିବା ପାଇଁ
କଷ୍ଟେ ମଷ୍ଟେ ଏକ କମ୍ପାନୀ ଚାକିରୀ
କଟକରେ ଗଲା ପାଇ |
ଗୋଟିଏ ଚାଉଳେ ଗଠିତ ଶରୀର
ଅଙ୍ଗେ ଉତ୍ତାଳ ଯୌବନ
ତା ରୂପେ ପାଗଳ ହୋଇ ଯୁଵା ଦଳ
ଚିନ୍ତିଲେ ଗଣ ଧର୍ଷଣ |
ଜାଣି ନିରୁପମା ହାତେ ମାପି କରି
ଚାଖଣ୍ଡକେ ଚାଲୁଥାଏ
ତଥାପି ପୁଷ୍ପିତା ସୁମନକୁ କାହିଁ
ଭ୍ରମର କି ଛାଡ଼ି ଯାଏ |
ସମ୍ପର୍କୀୟ ଜଣେ ପୋଲିସ ଭାଇର
ଗୃହରେ ରହିଲା ଯାଇ
ଗୁଣ୍ଡା ଉପଦ୍ରବୁ ନିରାପଦେ ରହି
ପୁଅକୁ ପାଠ ପଢ଼ାଇ |
ପାଉଁଶ ତଳର ସପନ ତାହାର
ସତେ ଚରିତାର୍ଥ ହେଲା
ସ୍ନାତକ ପଢ଼ି ତା ପୁଅଟି ସର୍କାରୀ
ଚାକିରୀରେ ଯୋଗ ଦେଲା |
ମାଆର ଆଖିରୁ ଆନନ୍ଦାଶ୍ରୁ ବହେ
ପୁତ୍ରେ କରି ଆଲିଙ୍ଗନ
ଦୁଇ ବର୍ଷ ପରେ ପୁତ୍ର ସଙ୍ଗେ କଲା
ଗାଆଁକୁ ପ୍ରତ୍ୟାବର୍ତ୍ତନ |
ଖୁସିର ଲହର ଖେଳିଗଲା ଗ୍ରାମେ
ଲୋକ ହେଲେ କୁହାକୁହି
ପାଉଁଶ ତଳର ସପନ ସାର୍ଥକ
ଧନ୍ୟ ନିରୁପମା ତୁହି |
