Library
ପାଉଁଶ ତଳର ନିଆଁ
ପାଉଁଶ ତଳର ନିଆଁ
ପାଉଁଶ ତଳର ଅଗ୍ନି ସେ ଆଜି
ପ୍ରଜ୍ଵଳିତ ଖରତର
ଅନେକ ଦିନର କୁହୁଳା ସ୍ୱପ୍ନର
ରୂପ ହୋଇଛି ସାକାର |
ନାମ ଅନିର୍ବାଣ ଶିଖା ଅନିର୍ବାଣ
ମହାପରାକ୍ରମୀ ଭୀମ
ମାତାର ପ୍ରତ୍ୟକ୍ଷ ଆଶୀର୍ବାଦେ ଦକ୍ଷ
ମହାତେଜା ଅରିନ୍ଦମ |
ଯଉବନର ସେ ପ୍ରଥମ ପାବଛେ
କରୁ କରୁ ପଦାର୍ପଣ
ପିତା ଶତ୍ରୁ କିଏ କୁଳଶତ୍ରୁ କିଏ
ପଚାରଇ ବିଚକ୍ଷଣ |
ଦେଖି ବେଳକାଳ ଜନନୀ ତାହାର
ସକଳ ବୃତାନ୍ତ ଫେଇ
କହିଲେ ପୁଅକୁ ମନର କୋହକୁ
ଶତ୍ରୁକୁ ଦେଲେ ଚିହ୍ନାଇ |
ସେ ଭାନୁପ୍ରତାପ ତୋ କକା କୁଖ୍ୟାତ
ପିତାଙ୍କୁ କରିଲା ହତ୍ୟା
ପୋଡିଦେଲା ଘର ମୋ ଉପରେ
ତାର ପାପ ନଜର ସର୍ବଥା |
ତୋତେ ଧରି ମୁହିଁ ଅଇଲି ପଳାଇ
ଅଜା ଘରେ ରହିଥାଇ
ନିରନ୍ତର ସେହି ଲୋମହରଷଣ
ଦୃଶ୍ୟକୁ ହୃଦେ ଚପାଇ |
ଆମରି ସମ୍ପତ୍ତି ହଡପ କରି ସେ
ବୋଲାଉଛି ଧନପତି
ଡରାଇ ମରାଇ କରି ଗୁଣ୍ଡାଗିରି
ବଢ଼ାଇଛି ପ୍ରତିପତି |
ତା ବିରୁଦ୍ଧେ କେହି କଲେ ପ୍ରତିବାଦ
ଗୋପନେ କାଟଇ ତଣ୍ଟି
ମଦ୍ୟପ ମାତାଲ ଗୁଣ୍ଡା ଦଳେ ରଖି
ଆଦାୟ କରୁଛି ବଟି |
ତା ସାଥିରେ ବାପା ନକର କଳହ
କରିଦେବ ସର୍ବନାଶ
ତୁହି ମୋ ବଂଶର ଶେଷ କୁଳଦୀପ
ନଯା ବାବୁ ତାର ପାଶ |
ନାମ ଅନିର୍ବାଣ ପଣ ମୋର ଟାଣ
ଶାଣ ଖଡ଼ଗରୁ ବଳି
ପିତୃ ମାତୃ ଦ୍ରୋହୀ କୁଳଘାତକକୁ
ଦେବୀ ପାଶେ ଦେବି ବଳି |
ଦେଖିଲା ଆସୁଛି ମହା ମତ୍ତଗଜ
ପରାୟ ଭାନୁପ୍ରତାପ
ସଙ୍ଗରେ ଅଛନ୍ତି ବାଘୁଆ ରଘୁଆ
ବେନି ଶିବଙ୍କର ସାପ |
ପ୍ରଚଣ୍ଡ ବିକ୍ରମେ ତରବାରୀ କରେ
କଲା ଖରେ ଆକ୍ରମଣ
ଜୀବନ ବିକଳେ ଚେଲା ପଳାଇଲେ
କକାର ହେଲା ମରଣ |
ସର୍ବେ ହେଲେ ଖୁସି ଗ୍ରାମେ ଆସେ ଶାନ୍ତି
ନିଷ୍କଣ୍ଟକ ହେଲା ମହୀ
ଜନନୀ ଆଖିରୁ ମହାଆନନ୍ଦରେ
ଲୁହ ଧାର ଗଲା ବହି ।
