ପାଠପଢା ଦିନ ଓ ବର୍ଷା
ପାଠପଢା ଦିନ ଓ ବର୍ଷା
ଓଗାଳେ ବାଟକୁ ବରଷା ଅସରା
ପୋଷାକ କରଇ ଓଦା
ସମ୍ଭାଳି ବସ୍ତାନି ଏକ ହାତେ ଛତା
କଷ୍ଟ ପଥଚଲା ମାନ୍ଦା ।
ଟଳମଳ ହୁଏ ସାଇକେଲ ଚକ
ବିଦ୍ୟାର୍ଥୀଙ୍କୁ ଅସମ୍ଭାଳ
କାଦୁଅ ପାଣିରେ ପଡିଯିବା ଭୟ
ହଟିଲେ ଟିକେ ନଜର ।
ପାଣି ସରସର ମୁଣ୍ଡ ଗୋଡହାତ
ଛତାରୁ ନିଗିଡା ପାଣି
ଛୁଟେ ପାଣିଧାର ବିଦ୍ୟାଳୟ ଗୃହେ
ଶୁଭେ କଳରବ ଧ୍ବନି ।
ଶ୍ରେଣୀ ପାଠପଢା ହୁଏ ଧିମା ମାନ୍ଦା
ଜମେ ସଙ୍ଗୀତ ଆସର
ତାଳିକୁ ବଜାଇ ଠୁମୁକାଇ ତାଳ
ଗୁଞ୍ଜେ ସ୍ବର ସୁମଧୁର ।
କାହାର କର୍କଶ ଶୁଭେ ମୋଟା କଣ୍ଠ
ମେଣ୍ଢା ଶ୍ବାନ ଗର୍ଦ୍ଦଭର
କରି ଉପହାସ କହନ୍ତି ପିଲାଏ
କୋଇଲିର ମଳଦ୍ଵାର ।
ବେଳ ଥାଉଁ ଶିଘ୍ର ହୋଇଯାଏ ଛୁଟି
ଘଣ୍ଟିବାଜେ ଠନଠନ
କମ ପାଠପଢା ଅଧିକ ମଉଜ
ବର୍ଷାଦିନ ମହାନନ୍ଦ ।