ପାଷାଣ କି ଚକାଡୋଳା
ପାଷାଣ କି ଚକାଡୋଳା
ଆହେ ଜଗଦିଶ ମୋ କଳା ସାଆନ୍ତ
ଏ କି ବିଚିତ୍ର ଲୀଳା
ସବୁ ଦେଖୁଅଛ ସବୁ ଶୁଣୁଅଛ
ନିରବ କିଆଁ ଚକାଡୋଳା ll
ଭାବଗ୍ରାହୀ ପ୍ରଭୁ ଭାବ ବିନୋଦିଆ
ଅନାଥ ଜନର ବନ୍ଧୁ
ତୁମ ଦରବାରେ ଏମିତି କାହିଁକି
କୁହ ହେ କରୁଣା ସିନ୍ଧୁ ll
ତୁମେ ପରା ଅଟ ସର୍ବ ବିଦ୍ୟମାନ
ଯଶୋଦା ଗଣ୍ଠି ରତନ
ଅସତ୍ୟ ଅଧର୍ମ ତୁମ ରାଇଜରେ
ବିସ୍ତାରେ ତା ଉପବନ ll
ଦୁଃଖୀ ରଙ୍କିଙ୍କର ଦୁଃଖ ଦେଖି ପରା
ଚଉବାହା ଦିଅ ପ୍ରସାରି
ମାଆ ଟିଏ ଆଜି ବିକଳ ହୁଅଇ
ପୁଅର କୋକେଇ ଧରି ll
ଅଳି କରେ ଆଜି ତବ ଶ୍ରୀ ଚରଣେ
ଅନ୍ୟାୟ ଅସତ୍ୟ ନାଶ
ଦୁଷ୍ଟ ରାକ୍ଷସର କରାଳ କୋପରୁ
ସୁରକ୍ଷିତ ହେଉ ଦେଶ ll