ପାର୍ବଣର ସଜବାଜ

କାହିଁକି ଲୋ ମାଆ ଆସିବୁ ମରତ

କିବା ଦେଖିବାକୁ ଆଉ,

ଉଜୁଡ଼ି ଗଲାଣି ସୁଖର ସପନ

ସବୁ ମାଆ ଥାଉ ଥାଉ । 

ମରତ ମାଟିର ନାହିଁ ସଜବାଜ 

ପୂଜା ମଣ୍ଡପରେ ଭିଡ଼,

ମଶାଣି ମାଟିରେ ଗଡୁଛି ଏସନ

ଶବମାନଙ୍କ ହାଡ଼ । 

ଅଶିଣରେ ନାହିଁ ପବନର ଢେଉ

ଖେଳୁ ନାହିଁ କାଶଫୁଲ,

ମନମାରି ଦେଇ ଶୋଇଛି ଶରତ

ନାହିଁ ତା'ର ହଲଚଲ । 

ପାର୍ବଣର ଭିଡ଼ ନୂଆ ସଜବାଜ

ପିଠାପଣା ଖିରି,ପୁରୀ,

ବୋଉ ଗଢିବାକୁ ମନା କରୁଅଛି

କରୋନା ରୋଗକୁ ଡରି । 

ଆସୁଛତ ଆସ ମନା ନାହିଁ କିଛି

ମନରେ ନକରି ରୋଷ,

ଜଗତ ଜନନୀ ଭୁବନ ମୋହିନୀ

ଧରି ତୁମେ ନୂଆ ବେଶ ।