ଟୁକୁନୁର ନୂଆ ସାଇକେଲ

ନୂଆ ଜାମା ପ୍ୟାଣ୍ଟ ସାଇକେଲ ଦେଖି

ଟୁକୁନୁର ମନ ଖୁସି

ଗୋଡ଼ ତାର ଆଉ ଲାଗୁ ନାହିଁ ତଳେ

ଦଉଚି ମୁରୁକି ହସି ।

ସାଇ ପଡିଶାରୁ ଡାକି ଆଣୁଅଛି

ଯେତେ ତାର ସାଙ୍ଗସାଥି

ଦେଖାଉଛି ତାର ନିଧି ଓ ସମ୍ପତ୍ତି

ବଖାଣୁଛି କରାମତି ।

ଲାଗୁ ନାହିଁ ତାକୁ ଆଉ ଭୋକଶୋଷ

ଆଜି ତାର ଜନ୍ମଦିନ

ସାଙ୍ଗ ମେଳେ ସିଏ କରିବ ମଉଜ

ଆନନ୍ଦ ହୋଇବ ମନ ।

ପିଠା ପଣା କ୍ଷୀରି ଲଡୁ ରସଗୋଲା

ଖାଇବେ ସମସ୍ତେ ମିଶି

ସାଇକେଲ ଚଢି ହସିବେ ଖେଳିବେ

ସଞ୍ଜ ଗଡି ହେବ ରାତି ।

ନୂଆ ନୂଆ ଚିଜ ଖେଳନା କଣ୍ଢେଇ

ପେନସିଲ ବହି କଲମ

ପାଇଲେ କିଛି ବି ନୂଆ ଉପହାର

ନାଚି ଉଠେ ଶିଶୁ ମନ ।

ବଢେ ତା ଆଗ୍ରହ ଆନନ୍ଦ ଉତ୍ସାହ

ବିକଶେ ତା ବୁଦ୍ଧି ଜ୍ଞାନ

ଟୁକୁନୁର ସ୍ୱପ୍ନ ପଢିବ ସେ ପାଠ

ଲଗାଇ ଅଧିକ ମନ ।