ଜାଗି ଉଠ କବି

ଜାଗି ଉଠ କବି ସୁଷୁପ୍ତି କୁ ତେଜି

ଲେଖନୀ ହାତରେ ଧର,

ମଣିଷ ଜାତି କୁ ଚେତାଇ ଦିଅ ହେ

କର୍ତ୍ତବ୍ୟ ଓ ଅଧିକାର l

ଆମ ସଂସ୍କୃତି କୁ ଉଜ୍ଜୀବିତ କର

ତୁମରି ଲେଖନୀ ଧାରେ,

ଆଗାମୀ ପୀଢ଼ି ଉଦବୁଦ୍ଧ ହୁଅନ୍ତୁ

ପଢିତାକୁ ଲେଖାପରେ l

କବିଙ୍କ ଲେଖନୀ ଅତୀତରେ କେତେ

ରଚିଅଛି ଇତିହାସ,

କ୍ରାନ୍ତିଭରା ଲେଖା ଲେଖିଛନ୍ତି କେତେ 

ଲୋକଙ୍କୁ ଦେଇ ସାହସ l

ସମାଜର କେତେ କୁସଂସ୍କାର ପାଇଁ

ସାହସେ ଲେଖନୀ ଧର,

କନ୍ୟା ଭୃଣ ହତ୍ୟା, ନାରୀ ନିର୍ଯାତନା

ବିରୁଦ୍ଧେ ଉଠାଅ  ସ୍ୱର l

ଓଡ଼ିଆ ସାହିତ୍ୟର ମର୍ଯ୍ୟାଦା ପାଇଁ

ଲଢ଼ିଥିଲେ ଲେଖା ବଳେ,

କରବାଳ ଠାରୁ କଲମ ଅଧିକ

ଶକ୍ତି ଶାଳୀ ମହୀ ତଳେ l

ମଧୁ ଗଙ୍ଗାଧର ଫକୀର ମୋହନ

ଭାଷାର ସମ୍ମାନ ପାଇଁ,

ଓଡ଼ିଆ ଭାଷାକୁ ସ୍ୱତନ୍ତ୍ର କରିଲେ 

କେତେ କେତେ କଷ୍ଟ ସହି l

ଲେଖିଯାଇଛନ୍ତି କାଳ ଜୟୀ କେତେ

ଗଳ୍ପ ପ୍ରବନ୍ଧ କବିତା,

ତାଙ୍କରି ଆଦର୍ଶ ବିକିରିତ ହେଉ 

ଯେସନେ ଆକାଶୁ ସବିତା ll