ହଜିଲା ସ୍ମୃତି
ହଜିଲା ସ୍ମୃତି
ଗାଆଁ ମଫସଲେ ଥିଲା ଆମ ଘର
କଲେଜଠୁ କିଛି ଦୂର
ଚଢି ସାଇକେଲ ପାରି ହେଉଥିଲୁ
ବନ୍ଧ ହିଡ଼ ନଈ ନାଳ ।
ବରଷା ଦିନରେ ନଈ ଖରସ୍ରୋତା
ଖାଏ ଏକୂଳ ସେକୂଳ
ପାଏ ନାହିଁ କାତ ଚଳେ ଆହୁଲାରେ
ଲାଗେ ବଡ଼ ଭୟଙ୍କର ।
ବସି ଖୁଣ୍ଟପରି ପଟୁଆ ଭିତରେ
ହେବ ନାହିଁ ହଲଚଲ
ମଝିରେ ମଝିରେ ଶୁଭୁଥିବ ଖାଲି
ହୁଳହୁଳି ହରିବୋଲ ।
ଖଣ୍ଡେବାଟ ଯିବ ବାଲିରେ ଚାଲିକି
ସାଇକେଲ ଠେଲିପେଲି
ପଟୁଆ ଭିତରେ ଟେକିକି ଥୋଇବ
ଓହ୍ଲାଇବ ଯତ୍ନକରି ।
କଲେଜକୁ ଗଲେ ବଢିବ ନଲେଜ
ମନେ ଥାଏ ଆଶା ନିଶା
ଦିଶେ ନାହିଁ କିଛି ଖାଲ ଖମା ଗାଢ଼
ଝଡି ହେଉ ଅବା ବର୍ଷା ।
ଗୋଟାପଣେ ଭିଜି ଓଦା ସରସର
ଦେଉଥିଲୁ ପାଠେ ଧ୍ୟାନ
ମନେ ପଡିଗଲେ ହଜିଲା ସେ ସ୍ମୃତି
ଜୀଇଉଠେ ସୁଖ ସ୍ୱପ୍ନ ।