Library
Profile
ପାଇଛି ମନୁଷ୍ୟ ଜନମ
ପାଇଛି ମନୁଷ୍ୟ ଜନମ
ମର୍ତ୍ତ୍ୟ ମଣ୍ଡଳରେ ଜନମ ଲଭିଛି ହୋଇ
ମନୁଷ୍ୟ, ଦିନେ ନା ଦିନେ ମରିବି
କର୍ମ ଅଟେ ମୋର ଗୁରୁ, ଜନ୍ମର ସାର୍ଥକତା
ପାଇଁ ସଦା ସୁକର୍ମ କରୁଥିବି |୧|
ପ୍ରକୃତିର ନୀତି ନିୟମକୁ ମାନିକି ଚଳିବି,
ନହୋଇ ତ କେବେ ଛାନିଆ
ନ୍ୟାୟବାନ ହୋଇ ବଂଚିବି, ଯେ ପର୍ଯ୍ୟନ୍ତ
ନିଜ ଗୋଡରେ ହୋଇଛି ଠିଆ |୨|
ବିଭିନ୍ନ ରଙ୍ଗ ତ ରହିଛି ଓ ନିଶ୍ଚିତ ରହିବ ମୋ
ଏଇ ଜୀବନ ରାସ୍ତାରେ
ରହିଛି ରଙ୍ଗ ବଦଳାଉ ଥିବା ମଣିଷଙ୍କ ଠାରୁ
ଦୂରତା ରକ୍ଷା କରିବାରେ |୩|
ଦେଖେ ମୁଁ, ବ୍ୟକ୍ତିର ସର୍ବସ୍ୱ କରୁଛନ୍ତି ନାଶ
କିଛି ଲୋକ ବଳ ଦଳ କଳକୁ ଲଗାଇ
ଗଣତନ୍ତ୍ର ନାମେ ଜୋ'ର ଯା'ର ପଣ ବଳରେ
କରନ୍ତି ଶାସନ, ଗଣତନ୍ତ୍ର କାଗଜରେ ଥାଇ |୪|
ଠକ, ଭଣ୍ଡ, ସ୍ୱାର୍ଥ, ସୁବିଧାବାଦୀ ଡରାଇବେ
ଅବା ଭଣ୍ଡିବେ ଯେତେ ମୋତେ ନିତି
ଭୀରୁତା କାପୁରୁଷତା ଆସିଲେ ନିତ୍ୟ ମରିବି,
କିଆଁ ଭୟରେ କୁହ ତ ଯିବି ଲୋଟି |୫|
ଜାଣିଛି ଶୋଇବା ପୁଅର ଭାଗ ନାହିଁ ପରା,
ସବୁଠି ସେ ହୁଏ ଅଣ ଦେଖା
କାର୍ଲ ମାର୍କ୍ସର ହୁଙ୍କାର, ଏକତାର ଚିତ୍କାରରୁ
ହୋଇଛି ସଚେତନ, ପାଇଛି ଶିକ୍ଷା |୬|
ପାଇଥାଏ ନ୍ୟାୟ ନିଷ୍କାମ ଧର୍ମରେ ନିର୍ବେଦ
କର୍ମେ,
ବିଚାର ବିବେକବନ୍ତ
ଭାଙ୍ଗିଗଲେ ଅନ୍ୟାୟରେ ମୁହିଁ ପାଇବିଟି ନିନ୍ଦା
ପାଇବି ତ ଦୁଃଖ ଅପ୍ରମିତ |୭|
ପାଇଛି ଶିକ୍ଷା, ମଉନ, ନୀରବ, ଶାନ୍ତ, କାନ୍ତ
ଭାବନାକୁ କେହି ତ ନବୁଝେ
ହତାଶ ନହୋଇ, ସଂଘର୍ଷକୁ ବାହି, ସଂଗ୍ରାମେ
ରୁହେ ନ୍ୟାୟ ପାଏ ଯିଏ ଯୁଝେ |୮|
ପ୍ରକୃତିର ସବୁ ନୀତି ନିୟମକୁ ମାନିକି ଚଳିବି,
ନହୋଇ ତ କେବେ ଛାନିଆ
ନ୍ୟାୟ ପାଇଁ ଲଢ଼ିବି ଓ ଲଢ଼ିବା ସମୟେ ଭୟ
ତ୍ୟାଗ କରି, ସତ୍ୟ ପଟେ ହେବି ଠିଆ |୯|
ସାହସପଣ ଭରି, ରଖି ଧୀର ଓ ସ୍ଥିର ମନ,
କାତରତାପଣ ତ୍ୟାଗ କରିବି
ଗଲା କଥା ତ ଗଲାଣି, ଅତୀତ ଘଟଣା
ମନେ ଭାବି କାହିଁକି ଦୁଃଖିତ ହେବି| ୧୦|
ଅତୀତର ଭୁଲ ଗୁଡିକରୁ ଶିଖି, ଦୁଃଚିନ୍ତା
ତ୍ୟାଗ କରି ଚାଲିବି ଜୀବନ ପଥରେ
ଆଦର୍ଶ ଜୀବନ ବଂଚିବାର ପାଇଁ ଧ୍ୟାନ
ରଖିଥିବି ସବୁ ବେଳେ ମୋର ମନରେ |୧୧|
ମଣିଷ ଜୀବନ ନୁହଁଇ କେବଳ ଦଣ୍ଡ ଦିନ
ମାସ ବର୍ଷ କେବେରେ
ସମୟକୁ କରିବି ଉପଭୋଗ, ଗର୍ବ ତ୍ୟାଗ
କରି ଏହି ଜୀବନ ମଧ୍ୟରେ |୧୨|
ସମାଜର ମଧ୍ୟେ ଉତ୍ତମ ସମ୍ପର୍କ ରଖିଣ
ଚଳିବି ଭଲ ବୁଝାମଣାରେ
ସର୍ବଦା ଆଦର୍ଶ ଜୀବନ ବଂଚିବାର ପାଇଁ
ଧ୍ୟାନ ରଖି ଥିବି ମନରେ |୧୩|
