ଓଡ଼ିଆ ଜାତିର ଲଢୁଆ ବୀର-22: ବାସୁ-ବିଶୁନି

କନିକା ରାଇଜେ ରାଜେନ୍ଦ୍ର ରାଜନ ବସାଇଲେ ନୂଆକର,

ଖଟିଖିଆ ଲୋକ ଗରିବ ଜନତା ରାଗେ ହେଲେ ଜରଜର |

ବର୍ତ୍ତନୀ ଗାଆଁର ଦୀନବନ୍ଧୁ ରାୟ ସାଜିଲେ ବିପ୍ଳବୀ ବୀର,

ମାତିଲେ ଜନତା ପାଇ ଯୋଗ୍ୟନେତା ରାଜାଙ୍କୁ ଲାଗିଲା ଡର |

ଦୀନବନ୍ଧୁ ଘରେ ବିଶୁନି ନାମରେ ଗୋରୁକାମ କରେ ଯିଏ,

ମାଲିକ ଡାକରେ ଠେକା ବାନ୍ଧି ଶିରେ ବିପ୍ଳବୀ ହୋଇଲା ସିଏ |

ବାସୁସେଠୀ ନାମେ ରଜକ ଭାଇ ସେ ତେନ୍ତୁଳିକୁଲିରେ ଘର,

ଗାଆଁଗାଆଁ ବୁଲି ଲୁଗାକାଚି ବଞ୍ଚେ, କାହାକୁ ନ ଥାଏ ଡର |

ଅନ୍ୟାୟ ବିରୁଦ୍ଧେ ତେଜିଲା ବିପ୍ଲବ ଫଉଜ ଆସିଲେ ମାଡ଼ି,

ବାସୁଆ ମୁଣ୍ଡରେ ଗାମୁଛା ଭିଡ଼ିଲା ହାତରେ ବାଟୁଳି ଖଡ଼ି |

ବିଶୁନି ଆସିଲା ବାଡ଼ିକୁ ବୁଲେଇ ଆଖିବୁଜି ଦେବ ପିଟି,

ଫିରିଙ୍ଗି ଫଉଜ ବିଦ୍ରୋହୀ ଜନତା ହୋଇଗଲେ ଭେଟାଭେଟି |

ମେଘପୁର ଗାଆଁ ବେବର୍ତ୍ତା ପୋଖରୀ ହୁଡ଼ାରେ ଫୁଟିଲା ଗୁଳି,

ପ୍ରଥମ ଗୁଳିରେ ସାହସୀ ବାସୁଆ ଭୂଇଁରେ ପଡ଼ିଲା ଢଳି |

ଛତ୍ରଭଙ୍ଗଦେଲେ ଗ୍ରାମବାସୀ ନେତା ଚାରିଆଡ଼େ ହାହାକାର,

ବିଶୁନି ବୁଲାଏ ସୁନ୍ଦରୀ ଠେଙ୍ଗାକୁ ଜୀବନ ତା’ ପାଇଁ ଛାର |

ବାଜିଲା ଛାତିରେ ଫଉଜର ଗୁଳି ବିଶୁନି ପଡ଼ିଲା ଲୋଟି,

ସହିଦ ରକତେ ତୀର୍ଥଭୂମି ହେଲା ଦୁଃଖିନୀ କନିକା ମାଟି |