ନୂତନ ପୃଥିବୀ
ନୂତନ ପୃଥିବୀ
ନୂତନ ପୃଥିବୀ
ପ୍ରସୂତି ଭବନେ ବସିଛି ମେଦିନୀ
ଅସରା ଯାତନା ସେ ଗର୍ଭଧାରିଣୀ
ମନେ ବହି ଥକି ଭାବିଯାଏ ପୁଣି
ଘନେଇ ଆସୁଛି ଘନ ।
ଦଶଦିଗ ଯେବେ ହେବ ଅନ୍ଧକାର
ପ୍ରସୂତି ବେଦନା ହୋଇଯିବ ଦୂର
ଅଦୃଷ୍ଟ ମୂହୁର୍ତ୍ତେ ଜନ୍ମ ହେବ ତାର
ଏକ ପୃଥିବୀ ନବୀନ ।
ବହି କଳେବରୁ ଅମାପ ଶୋଣିତ
ଛୁଟିଯିବ ଯେହ୍ନେ ବନ୍ୟାଜଳ ସ୍ରୋତ
ମାତା ଗର୍ଭ ଚିରି ଶିଶୁ ହେବ ଜାତ
ହେବ ଏ ପ୍ରକୃତି ଛିନ୍ନ ।
ଜନ୍ମ ହେବ ଯେଉଁ ନୂତନ ପୃଥିବୀ
ଭଲ ଅବା ମନ୍ଦ କି ହେବ ତା ଭାବି
ମାତା ମନେ ଭ୍ରାନ୍ତି ସଂଶୟକୁ ଲଭି
ବିରସେ ବଦନ ମ୍ଳାନ ।
ମଣିଷର ରକ୍ତ ବହି ପଛେ ଯାଉ
ଦେଶ ସାରା ଅଗ୍ନି ଜଳୁ ଦାଉ ଦାଉ
ବିଶ୍ବଯୁଦ୍ଧେ ପୁଣି ହେଲେ ଅବା ହେଉ
ପରମାଣୁ ବିସ୍ଫୋରଣ ।
ତଥାପି ଧରଣୀ ଜନ୍ମ ଦେବ ଏକ
ନୂଆ ପୃଥିବୀକୁ ଯନ୍ତ୍ରଣା ଅନେକ
ଧରାପୃଷ୍ଠେ ପାପଭାର ତା ପ୍ରତୀକ
ଶତାବ୍ଦୀ ନୁହେଁ ସେ କ୍ଷଣ ।
କବି - ଶ୍ରୀଯୁକ୍ତ ପ୍ରସନ୍ନ କୁମାର ମାଦଳା