ଲାଇବ୍ରେରୀ
ପ୍ରୋଫାଇଲ୍
ଅଜାମିଳ ଚରିତ
ଅଜାମିଳ ଚରିତ
ରୋଗାକ୍ରାନ୍ତ ଶରୀର ଯନ୍ତ୍ରଣା ମରଣ ଶଯ୍ୟାରେ
ପୁତ୍ର ନାରାୟଣ ପ୍ରତି ଡାକ ବ୍ୟାକୁଳ ହୃଦରେ
ଭୟଙ୍କର ଯମ ଦୂତ ଦୃଶ୍ୟ ଶେଷ ମୁହୂର୍ତ୍ତରେ
ନାରାୟଣ ନାମ ଥିଲା ଅଜାମିଳର ମୁଖରେ
ନାରାୟଣ ନାମ ଶୁଣି ଉଭା ହେଲେ ବିଷ୍ଣୁ ଦୂତ
ଦୁଇ ପକ୍ଷ ଦୂତ ମଧ୍ୟେ ତର୍କ କ୍ରମେ ବିସ୍ତାରିତ
ଅଜାମିଳ ଜୀବନର ଚରିତ୍ର ସମୀକ୍ଷା ଧାରେ
ନାରାୟଣ ନାମର ମହିମା ଜ୍ଞାତ ସହଜରେ
ଏକ ନୈଷ୍ଠିକ ବ୍ରାହ୍ମଣ କୁଳେ ଜନ୍ମି ଅଜାମିଳ
ଶାସ୍ତ୍ର ବିଶାରଦ ସହ ଥିଲା ହୃଦୟ ନିର୍ମଳ
ପିତାମାତା ଗୁରୁଜନ ବୃଦ୍ଧ ମାନଙ୍କ ସେବାରେ
ନିୟୋଜିତ ଥିଲା ଅଜାମିଳ ପ୍ରତି ମୁହୂର୍ତ୍ତରେ
ମନ ମଧ୍ୟେ କାମନା ବାସନା ହେଲା ବଳବତି
ପତିବ୍ରତା ପତ୍ନୀ ସତ୍ବେ ବେଶ୍ୟା ପ୍ରତି ବି ଆସକ୍ତି
ବେଶ୍ୟାଶକ୍ତ ଅଜାମିଳ ଭୁଲି ହିତାହିତ ଜ୍ଞାନ
ପରିବାର ପରିଜନ ଠାରୁ କ୍ରମଶଃ ବିଚ୍ଛିନ୍ନ
ନିଜ ପିତାମାତା ପୁଣି ପତ୍ନୀ ପରିତ୍ୟାଗ ପରେ
ଅବଶିଷ୍ଟ ଜୀବନ କ୍ରମଶଃ ବେଶ୍ୟା ସହିତରେ
ବେଶ୍ୟା ସୁଖ ଅର୍ଥେ ପୈତୃକ ସମ୍ପତ୍ତି ଅପବ୍ୟୟ
କ୍ରମେ ଅର୍ଥ ଶୂନ୍ୟ ପରେ ଦସ୍ୟୁ ବୃତ୍ତି କୁ ପାଥେୟ
ବେଶ୍ୟା ଔରସରୁ ଜନ୍ମି ଥିଲେ ଦଶଟି ସନ୍ତାନ
କନିଷ୍ଠ ସନ୍ତାନ ନାମକରଣ ହିଁ ନାରାୟଣ
ନଅ ଟି ସନ୍ତାନ ଜନ୍ମ ଦେଇ ସେଇ ବେଶ୍ୟା ନାରୀ
ସାଧୁ ସନ୍ଥଙ୍କ ସେବାରେ କ୍ରମେ ଧ୍ୟାନ ସର୍ବୋପରି
ଅଜାମିଳ ଦ୍ଵାରା ଯେଉଁ ଧନ ଦସ୍ୟୁ ବୃତ୍ତି ଧାରେ
ପତ୍ନୀ ରୂପୀ ବେଶ୍ୟା ଦ୍ଵାରା ନାପସନ୍ଦ ହେଲା ଧିରେ
ଗର୍ଭରେ ସନ୍ତାନ ଥାଇ ସ୍ୱ ଅର୍ଜିତ ଅର୍ଥ ବଳେ
ଗୃହ ମଧ୍ୟେ ଭଜନ କୀର୍ତ୍ତନ ହେଲା ସାଧୁ ମେଳେ
ଜନ୍ମ ହେଲା ଯେବେ ଏକ ପୁତ୍ର ଯଥା ସମୟରେ
ନାରାୟଣ ନାମେ ହେଲା ନାମକରଣ ଶ୍ରଦ୍ଧାରେ
ଅଜାଣତେ ଅଜାମିଳ ଡାକି ଅଛି ନାରାୟଣ
ପୁତ୍ର ନାମ ଧାରେ ବିଷ୍ଣୁଙ୍କ ନାମ ହେଲା ସ୍ମରଣ
ଶୟନେ ସପନେ ଅବା ଜାଗରଣେ ହରି ସ୍ମରି
ମହାପାପୀ ଅଜାମିଳ ମୁକ୍ତି ପ୍ରାପ୍ତି ସର୍ବୋପରି
ଆପେ ଫେରିଗଲେ ଯମ ଦୂତ ସମୀକ୍ଷା ଶେଷରେ
ଅଜାମିଳ ଲିପ୍ତ ହେଲା ହରି ନାମ ଭଜନରେ
ଅଜାମିଳ ଅଜାଣତେ ପୁତ୍ର ନାମ ଡାକ ଧାରେ
ଗ୍ରହଣୀୟ ହେଲା ନାରାୟଣ ପ୍ରତି ସ୍ମରଣରେ
ପୁତ୍ର ନାମ ଜପି ଜପି ତରିଗଲା ଅଜାମିଳ
ମୃତ୍ୟୁ ପରେ ବିଷ୍ଣୁ ଲୋକ,ଅବଶ୍ୟ ହେଲା ସଫଳ
ରାମ କୃଷ୍ଣ ନାରାୟଣ ମାଧବ ମଧୁସୂଦନ
ସମାଜରେ ପୁତ୍ର ନାମ ହେଉଛି ନାମ କରଣ
ଧନ୍ୟ ଅଜାମିଳ, ଧନ୍ୟ ତୁମ ଜୀବନ ବୃତ୍ତାନ୍ତ
ମଣିଷ ସମାଜ ପାଇଁ ଶିକ୍ଷା ଆକାରେ ଦୃଷ୍ଟାନ୍ତ
କୁସଙ୍ଗ ଓ ବ୍ୟଭିଚାର ଯୌବନର ଉଦାମତା
ପରିଣତି ବୟସରେ କ୍ରମେ ଅବଶ୍ୟ ଦୁଶ୍ଚିନ୍ତା
ଧର୍ମ ପଥେ ରହି ଧନ ଉପାର୍ଜନ ଧାରେ ଧର୍ମ
ଅନ୍ତ କାଳେ ସେଇ ଧର୍ମ ଜୀବନର ସାର ମର୍ମ
କାମନା ବାସନା ନ ହେଉ ଲକ୍ଷ୍ୟ ଏ ଜୀବନର
ଅଜାମିଳ ଚରିତ ରୁ ଶିକ୍ଷା, ଜୀବନ ସଂସ୍କାର
