ନୂଆବର୍ଷର ଅନୁଭୂତି
ନୂଆବର୍ଷର ଅନୁଭୂତି
ନୂଆ ବରଷର ଅନୁଭୂତି ଭିନ୍ନ
ନୂଆମନ ନୂଆ ପ୍ରାଣ
ନୂଆ ବରଷର ମଙ୍ଗଳ ପ୍ରଭାତ
ବିଞ୍ଚେ ସୁନେଲି କିରଣ ।
ନୃତ୍ୟ ଗୀତ ଭୋଜିଭାତର ଆସର
ଜମିଥାଏ ପୂର୍ବରାତି
ବାରଟା ବାଜିଲେ ଶୁଭ ନବବର୍ଷ
ଅଭିନନ୍ଦନ ଜଣାନ୍ତି ।
ନୂଆ ବରଷରେ ଆନନ୍ଦ ଉଲ୍ଲାସ
ବଣଭୋଜି ଆୟୋଜନ
ମଜାଲାଗେ ଭାରି ସାଙ୍ଗ ସାଥିମେଳ
ହରିନିଏ ମନ ବନ ।
ସବୁଜିମା ଭରା ବନ ପରବତ
ପାହାଡି ଟିକି ଝରଣା
କୁଳୁକୁଳୁ ନାଦେ କୁହଇ କାନରେ
ଟିକିଏ ବନ୍ଧୁ ଛୁଅ'ନା ।
ନାଚଇ ମୟୂର ଟେକି ତାର ପୁଚ୍ଛ
ତରକି ହରିଣ ଧାଏଁ
ନାହିଁ କୋଳାହଳ ମଧୁର କାକଳି
ପ୍ରାଣକୁ ନିଶ୍ଚୟ ଛୁଏଁ ।
ନିଶ୍ୱାସ ପ୍ରଶ୍ୱ।ସ ଲାଗଇ ସ୍ୱଚ୍ଛନ୍ଦ
ଆନନ୍ଦ ହୁଅଇ ମନ
ଜାଣି ହୁଏ ନାହିଁ ନଇଁ ଯାଏ ସଞ୍ଜ
ଲାଗେ ଖାଲି କାନ୍ଦ କାନ୍ଦ ।
ମାଆ ପରି ଆମ ଅଟଇ ପ୍ରକୃତି
ନିର୍ଭର ଲାଗେ ତା କୋଳ
ଅକୃତ୍ରିମ ତାର ମୁକ୍ତ ପରିବେଶ
ବାୟୁଜଳ ସୁଶୀତଳ ।
ପ୍ରଦୂଷିତ ଅତି ଗ୍ରାମ ଓ ସହର
ଶ୍ୱାସ ହୋଇଯାଏ ରୁଦ୍ଧ
ବରଷକେ ଥରେ ଦିଏ ବଣଭୋଜି
ପ୍ରଶାନ୍ତି ଅମୃତ ସ୍ୱାଦ ।
ଆମ ନଦୀକୂଳ ପର୍ଯ୍ୟଟନ ସ୍ଥଳୀ
ବଣଭୋଜି ମହାନନ୍ଦ
ଦେଉ ନାହିଁ ଆଉ ପୂର୍ବ ପରି ସୁଖ
କାରଣ ଦୁର୍ଭାଗ୍ୟପୂର୍ଣ୍ଣ ।
ସୁପରିଚ୍ଛନ୍ନତା ସ୍ଥଳୀର ବିକାଶ
ପ୍ରତି ରହୁ ନାହିଁ ଧ୍ୟାନ
ଅନେକ କ୍ଷେତ୍ରରେ କରୁଛନ୍ତି ଦୁଷ୍ଟ
ଅବୈଧ ଅତିକ୍ରମଣ ।
ଆଣୁ ନବବର୍ଷ ସୁଖର ସମ୍ଭାର
ବିକାଶ ସୁଅବସର
ଝଲସୁ ଜୀବନେ ଆଶାର ଆଲୋକ
ସବୁଜ ସୃଷ୍ଟି ସୁନ୍ଦର ।
-----