ନୂଆ ପୁରୁଣା

କେତେ ଜ୍ଞାନୀ-ମାନୀ-ଦେଶପ୍ରେମୀ ଲୋକ ଆଗରୁ ଗଲେଣି ଚାଲି,

କେତେ ଦୁଷ୍ଟ-ଖଳ-ଦେଶଦ୍ରୋହୀଙ୍କର ନାମକୁ ଗଲୁଣି ଭୁଲି ।

ଆହୁରି ଅଛନ୍ତି କେତେ ଯେ ବିଜ୍ଞାନୀ ନିସ୍ଵାର୍ଥ ସେବାରେ ବ୍ରତୀ,

ଦେଶ-ଜାତି ଚିନ୍ତା ସଂସ୍କୃତି ସୁରକ୍ଷା କରୁଛନ୍ତି ନିତିନିତି ।

ହିଂସା ସୃଷ୍ଟିକାରୀ ମିଥ୍ୟା ମୁଖାଧାରୀ ସମାଜରେ ରହିଛନ୍ତି,

କେତେ ଯେ ଲୁଟେରା ପଦବୀରେ ଥାଇ ଦେଶଧନ ଲୁଟୁଛନ୍ତି ।

ଆହୁରି ଆସିବେ ଏମାନେ ବି ଯିବେ ରହିଥିବ ଏହିଦେଶ,

ଅମୃତ ଯେଉଁଠି ବିଷ ବି ସେଇଠି କାନ୍ଦ ପରେ ଥିବ ହସ ।

ଯିଏ କରିଥିବ ଭଲକାମ କିଛି ରହିଯିବ ତା'ର ଯଶ,

ଦୁଷ୍ଟ-ଖଳଲୋକ ଘୃଣ୍ୟପୋକ ପରି ନରକେ କରିବେ ବାସ ।

ଆଜିର ଦିନଟି ଚାଲିଯିବ ପୁଣି ଅତୀତ ହୋଇବ କାଲି,

ପ୍ରକୃତି ନିୟମ ନୂଆକୁ ଆଦରି ପୁରୁଣାକୁ ଦେବ ଠେଲି ।