ନମ୍ବର

ସିଧାକଥା-୨୮

ନମ୍ବର ନମ୍ବର କେତେ ନମ୍ବରକୁ ମନରେ ରଖିବି ଭାଇ ?

ଘରର ନମ୍ବର ଜୋତାର ନମ୍ବର ମୂଳରୁ ମୋ ମନେନାହିଁ ।

ଆଧାର ନମ୍ବର ଭୋଟର ନମ୍ବର ପାନ ନମ୍ବର ଅଛି,

ଫୋନ ନମ୍ବର ବ୍ୟାଙ୍କ ନମ୍ବର ମନେ ରହୁନାହିଁ କିଛି ।

ଗାଡ଼ିର ନମ୍ବର ବ୍ଳାଉଜ ନମ୍ବର ଦୋକାନୀ ରଖିଛି ମନେ, 

ଟିଭିର ଚାର୍ଜ କାର୍ଡ଼ ନମ୍ବର କମ୍ପାନୀ ପିଲାଟା ଜାଣେ ।

ଟଙ୍କା ଉଠେଇବା ଖାତାର ନମ୍ବର ମେନେଜର ଦିଏ ଲେଖି,

ପିନ ନମ୍ବର ଲେଖିବାକୁ ମନା ତାକୁ ଟିପେ ଖାତା ଦେଖି ।

ଗ୍ୟାସ ନମ୍ବର ଭୁଲିଯାଇ ଥରେ ହଟହଟା ହେଇଥିଲି,

ବିଜୁଳି ବାଲାଙ୍କ ଗ୍ରାହକ ନମ୍ବର ମିଟରରେ ଲେଖିଦେଲି ।

ମାସ ନ ପୂରୁଣୁ ପାଣିବାଲା ଆସି ବିଲ ନମ୍ବର ମାଗେ,

ଖାତା ନ ମିଳିଲେ ମନେ ନ ପଡ଼ିଲେ ଘରଣୀ ଉପରେ ରାଗେ ।

ରାତି ପାହିବାଠୁଁ ଶୋଇବା ଯାଏ ମୁଁ ନମ୍ବର ମୁଖସ୍ଥ କରେ,

ଅସଲ ବେଳକୁ ମନେ ପଡ଼େନାହିଁ ନମ୍ବରକୁ ଭାରି ଡରେ ।